İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 236 Hüküm no: 241 Orijinal metin no: [71-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleyhinde dava açılan kişilerin mahkemeye getirilme usulü Makām-ı Meşîhat’den İstanbul Kādılığı’na Fazîletlü efendim hazretleri, Mehâkim-i şer‘iyeye muhavvel de‘âvîde müdde‘â-aleyhin celb ve ihzâri’çün evvelâ Havâle Müdüriyeti’nden üç def‘a sâniyen mahkemeden de üç def‘a ki altı def‘a da‘vet varakası gönderilip bundan sonra icâbet etmediği hâlde hükm-i gıyâbî i‘tâ olunmakda ise de altı def‘a da‘vet-i şer‘-i şerîfe mugāyir ve tas‘îbât ve teehhurâtı müstelzim bulunmasından dolayı ba‘demâ mahkeme-i şer‘iyeye celb ve ihzâr olunacak müdde‘â-aleyhimin Mecelle hükmünce üç def‘a da‘vetiyle iktifâ olunmasına dâir Anadolu Kādıaskerliği’nden i‘tâ kılınan takrîr Mecelle Cem‘iyeti’ne lede’l-havâle mehâkime muhavvel de‘âvîde müdde‘â-aleyhin celbi’çün üç def‘a da‘vet mu‘âmelesi hem nizâmât-ı adliyede ve hem de Mecelle’de musarrah olması mülâbesesiyle icrâsı muktezî olan bir mu‘âmelenin iki def‘a tekrârı gerek adliyece ve gerek mehâkim-i şer‘iyece üç def‘a da‘vet edilmesinden neşet ediyor ise de fi’l-vâki‘ bu mu‘âmele-i mükerrere de‘âvînin te’hîr-i rü’yetine bâdî olmakda olduğuna binâen ba‘demâ mehâkim-i şer‘iyeye muhavvel de‘âvîde müdde‘â-aleyhin celb ve ihzârı lüzûmu mahkeme-i şer‘iyeden Havâle Müdüriyeti’ne bâ-derkenâr i‘lâm olundukda müdde‘â-aleyhin gelmesini bir def‘a teklîf olunup bilâ-özr-i şer‘î gelmekden imtinâ‘ eylediği ya‘ni celbi mümkün olmadığı hâlde keyfiyet müdüriyet-i mezkûreden bâ-derkenâr i‘lâm olunması ve bunun üzerine Mecelle hükmünce mahkemeye müdde‘â-aleyh üç def‘a da‘vet olunarak muktezâ-yı şer‘iyenin icrâsı müşkilât-ı mezkûrenin def‘ine kâfî olduğu cihetle bu sûretle mu‘âmele edilmesiyle mu‘âmele-i meşrûhanın vilâyâta dahi ta‘mîmen bi’t-tezekkür keyfiyetin Adliye Nezâret-i celîlesine iş‘ârı ifâde olunmuş ve karâr-ı mezkûr Dersa‘âdet hükkâm-ı şer‘iyesiyle nezâret-i müşârün-ileyhâya teblîğ ve izbâr kılınıp taşra nüvvâbına da ol bâbda ta‘mîmen muharrerât-ı muhibbî tastîri derdest bulunmuş olmağla ber-minvâl-i muharrer îfâ-yı mu‘âmeleye himmet ve mehâkim-i merbûtâya da teblîğ-i keyfiyet buyurulması siyâkında tezkire-i senâverî terkīm kılındı. Fî 17 Cumâdelûlâ sene [1]302 ve fî 20 Şubat sene [1]300. Ahmed Esad