İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 237 Hüküm no: 242 Orijinal metin no: [71-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İranlıların Osmanlı kadınları ile evlenmelerine izin verilmemesi eğer evlilik olmuş ve çocuk doğmuşsa, bunlar Osmanlı tebası sayıldığından askere alınmalarında ona göre hareket edilmesi Makām-ı Meşîhat’den İstanbul Kādılığı’na Fazîletlü efendim hazretleri, İran Sefâreti tarafından bir müddetden berü hal ve tesviyesi taleb olunan mevâdd-ı ma‘lûmeye ve onun üzerine icrâsı lâzım gelen mu‘âmeleye dâir Hâriciye Nezâret-i celîlesinden vârid olan tezkire melfûf muhtıra ile beraber Meclis-i Mahsûs-ı Vükelâ’da lede’l-kırâe mevâdd-ı mezkûrenin biri teba‘a-i İrânîye ile izdivâc eden Osmanlı kadınlarından tevellüd eden çocukların askerden mu‘âfiyeti kazıyyesi olup Osmanlı kadınlarının İranlılarla izdivâcı nizâmnâme-i mahsûs ile men‘ edildiği cihetle şimdi onlardan tevellüd eden çocuklar hakkında tamamen teba‘a-i Devlet-i aliyye mu‘âmelesi icrâ olunması lâzımeden bulunmasına mebnî hükm-i nizâmın muhâfaza ve idâmesi’çün gerek mehâkim-i şer‘iye ve gerek devâir-i belediye ile eimme-i mahallâtdan taraflarından teba‘a-i Osmâniye’den olan bir kadının İran teba‘asıyla izdivâcı hakkında izinnâme ilmühaberi verilmemesine dikkat ve i‘tinâ olunarak şâyed memnû‘iyet-i vâkı‘a hilâfında hareket edenler olur ise mücâzât-ı şedîdeye dûçâr olacaklarının mehâkim-i mezkûre nâibleriyle devâir-i belediye rüesâsına ve eimme-i mahallâta kat‘ıyyen tenbîh ve tebyîniyle ba‘de ezîn hilâf-ı memnû‘iyet bu misillü münâkehât vukū‘a getirilmemesi esbâbının istihsâli tezekkür kılınarak nezâret-i müşârün-ileyhâ ile Dâhiliye Nezâret-i celîlesine ma‘lûmât verildiği beyân-ı âlîsiyle taraf-ı senâverîden dahi ber-mûceb-i karâr iktizâ-yı hâlin îfâsı cânib-i sâmî-yi Sadâret-penâhî’den bâ-tezkire iş‘âr buyurulmuş ve keyfiyet Dersa‘âdet hükkâm-ı kirâmıyla merâkiz-i vilâyât ve elviye-i müstakille ve Şehremâneti’ne mülhak mahâl-i ma‘lûme nevâibine teblîğ ve izbâr edilmiş olmağla savb-ı fâzılânelerinde hükm-i nizâmın muhâfazasıyla ba‘demâ hilâfı mu‘âmele îkā‘ olunmamasına mezîd i‘tinâ ve dikkat ve sûret-i iş‘âr-ı sâmînin îcâb edenlere beyân ve teblîğine mübâderet buyurulması siyâkında tezkire-i senâverî terkīmine ibtidâr olundu. Fî 25 Cumâdelûlâ sene [1]302 ve fî 28 Şubat sene [1]300. Ahmed Esad