İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 238 Hüküm no: 243 Orijinal metin no: [72-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gayrimenkul satış, ferağ ve intikalinde kişilerin tezkire-i Osmaniye ibraz etmesi gerektiği Dâhiliye Nezâreti’nden Taraf-ı âlî-yi hazret-i Meşîhat-penâhîye Ma‘rûz-ı bende-i dîrîneleridir ki, Her şahsın emvâl-i gayr-ı menkūle bey‘ ü ferâğ ve intikālinde tezkire-i Osmâniye ibrâzına mecbûr bulunduğu Nüfûs Nizâmnâmesi’nin birinci faslının dördüncü maddesi ahkâmından olduğu gibi işbu tezkirelerin taleb ve mu‘âyenesi vazîfesi dahi Dersa‘âdet’çe Vergi Emâneti ve taşralarca Defter-i hâkānî me’mûrlarına âid idiği Şûrâ-yı Devlet karârı iktizâsından bulunmuş ve bi’l-vekâle ferâğ ve intikāli icrâ edilecek emlâkin muvakkaten tahrîrden istisnâ edilen Hicaz, Yemen, Bingazi, Trablusgarb, Hakkâri gibi vilâyâtda bulunan huccâtın tezkire-i Osmâniyeleri <> olmak umûr-ı tabî‘iyeden bulunmasıyla bunların yalnız vekîllerinin tezkire talebiyle iktifâ olunmak tabî‘î bulunmuş ise de tahrîri icrâ edilen vilâyât ile Dersa‘âdet’de bulunanların bi’l-vekâle icrâ edecekleri bey‘ ve ferâğ ve intikāl için vekâlet hücceti olmak üzere mahalleri mehâkim-i şer‘iyesine hîn-i mürâca‘atlarından tezkire-i Osmâniye taleb olunup ibrâz edildiği hâlde tanzîm olunacak hüccetin zahrına tezkiresinin taleb ve mu‘âyene olunduğu ibâresinin bi’t-tahrîr mühürlenmesi ve ibrâz edemeyenler hakkında madde-i mezkûre ahkâmına tevfîk mu‘âmele edilmesi Sicill-i Nüfûs Müdüriyeti’nden bâ-müzekkere ifâde olunarak keyfiyetin taraf-ı âlî-i Meşîhat-penâhîleriyle Vergi Emânet-i aliyyesine teblîğ olunmağla beraber umûmen vilâyât ve elviye-i müstakilleye dahi yazılmış olmağla minvâl-i meşrûh vechile îfâ-yı mu‘âmeleye i‘tinâ ve himmet buyurulması bâbında emr ü fermân hazret-i men-lehu’l-emrindir. Fî 28 Rebî‘ülevvel sene 1302 ve fî 2 Şubat sene [1]302.