İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 239 Hüküm no: 244 Orijinal metin no: [72-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahih evrak kullanım süresi bitmişse de yeni pullar basılıncaya kadar hem sahih evrak hem de eski pul kullanılmaya devam edilmesi Mâliye Nezâreti’nden Ma‘rûz-ı bende-i dîrîneleridir ki, Evrâk-ı sahîhanın isti‘mâli müddetinin hitâm bulmasından nâşî devâir resminde ve eşhâs ve tüccâr beyninde te‘âtî edilecek ve muhteviyâtı nakde müstenid bulunacak temessüklerin ba‘demâ evrâk-ı sahîha üzerine yazılmayıp da guruşuna bedel yapışdırılması lâzım gelip gelmeyeceğine dâir Kosova Vilâyeti’nden vukū‘ bulan istifsârdan bahisle istîzân-ı mu‘âmeleyi mutazammın Bâbıâlî’ye takdîm kılınan tezkire-i âcizî üzerine Şûrâ-yı Devlet Tanzîmât Dâiresi’nden tanzîm olunup bir sûreti bâ-fermân-ı sâmî cenâb-ı vilâyet-penâhî cânib-i hazîneye irsâl buyrulan mazbatada Damga Kānûnu’nun otuz dördüncü maddesi hükmünce evrâk-ı sahîhanın isti‘mâline bir sene müddet ta‘yîn olunmuş ise de müddet-i mezkûre mürûr eylediği hâlde yeni pulların kalıpları devletçe bir karâr verilememesi cihetiyle henüz i‘mâl ve neşredilmemiş ve eğerçi varaka-i mevcûdenin temdîd-i müddet-i isti‘mâlinde bunlardan gayr-ı meşrû‘ sûretde elde edilmiş olanların sürümüne meydân verilmiş olacağı melhûz ise de evrâk-ı mezkûrenin yeniden neşrolunacak pulların tebdîli <> hâlinde dahi ne yolda ele geçirildiğinin tahkīkı müşkil olarak temdîd-i müddetdeki mahzûr tebdîlinde de <> vâki‘ idiğinden yeni pulların neşrine değin gerek evrâk-ı sahîhanın ve gerek eski pulların isti‘mâli zarûrî idiği beyân buyurulmuş olduğundan mezkûr kalıpların i‘mâliyle yeni pulların neşrine değin kānûn-ı mezkûr mûcebince müddeti münkaziye olan gerek evrâk-ı sahîha ve gerek eski pulların ber-sâbık isti‘mâli husûsunun bi’l-cümle devâir ve vilâyâta teblîği Vâridât İdâre-i Umûmiyesi’nden ifâde ve ol vechile her tarafta teblîğ-i madde kılınmış olmağın Bâb-ı Vâlâ-yı Meşîhat-penâhîlerince de ol vechile îfâ-yı muktezâtının îcâb edenlere emr ü tenbîh buyurulması bâbında emr ü fermân hazret-i veliyyü’l-emrindir. Fî 13 Cumâdelûlâ sene 1302 ve fî 16 Şubat sene [1]300.