İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 240 Hüküm no: 245 Orijinal metin no: [72-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memurların tercüme-i hal varakalarına, ellerinde bulunan şehadetnâme vesaireye yapıştırılacak pullara dair Mâliye Nezâreti’nden Ma‘rûz-ı bende-i dîrîneleridir ki, Me’mûrîn tercüme-i hâl varakalarına yedlerinde bulunan şehâdetnâmelerle tebrie-i zimmet mazbatalarının rabtı lâzım gelen sûretlerine kayd sûreti a‘şârıyla üçer guruşluk pul yapışdırılması mı yohsa resm-i damgaya tâbi‘ olmayan evrâkın sûretleri gibi müstesnâ tutulması mı veyâhûd cümlesine ale’s-seviy ilmühaber makāmında birer guruşluk pul rabtedilmesi mi lâzım geleceği iş‘ârını mutazammın Düyûn-ı Umûmiye-i Osmâniye Vâridât-ı Mahsûsası İdâresi’nin vârid olan fî 31 Kânûn-ı evvel sene [1]300 târih ve iki yüz on numaralı tezkiresi Encümen-i İdâre-i Mâliye’ye lede’l-havâle me’mûrîn-i munfasılaya verilen hüsn-i hizmet ve berâet-i zimmet mazbatalarına yapışdırılacak pullar hakkında sebk eden arz ve istîzân üzerine tebrie-i zimmet [73] mazbatalarıyla devr muhâsebesi defterlerinde asılları ya devâir-i merkeziyeye veyâhûd kazâdan livâya ve livâdan vilâyete hitâben tanzîm ve irsâl olunacağına nazaran bunlar devâir-i hükûmet beyninde te‘âtî kılınan evrâk-ı resmiyeden ma‘dûd olmasıyla damga resminden müstesnâ idiğinden yalnız bunların me’mûrîn cânibinden taleb ve ahz edilen nüsha-i sâniyelerine kayd sûreti i‘tibârıyla üçer guruşluk pul yapışdırılması Şûrâ-yı Devlet karârıyla müte‘allik buyrulan irâde-i aliyye iktizâsından olduğundan mebhûsün-anh olan tercüme-i hâl varakalarına rabt olunacak şehâdetnâme <> ve tebrie-i zimmet mazbataları sûretlerine kayd sûreti i‘tibârıyla üçer guruşluk pul yapışdırılması îcâb edip fakat doğrudan doğruya verilecek arzuhâllere kırkar paralık pul yapışdırılmakda olması cihetle yedlerinde bulunup bir sûreti ona rabtedilecek evrâka başkaca pul vaz‘ı îcâb etmeyeceğinin mezkûr düyûn idâresiyle devâir-i resmiye-i sâire ve vilâyât ve elviye-i müstakilleye ta‘mîmen izbârı encümen-i mezkûr karârıyla Vâridât İdâre-i Umûmiyesi’nden ifâde ve her tarafa teblîğ-i madde olmağın oraca dahi minvâl-i meşrûh üzere îfâ-yı muktezâsının îcâb edenlere emr ü tenbîh buyurulması bâbında emr ü fermân hazret-i veliyyü’l-emrindir. Fî 11 Cumâdelûlâ sene [1]302 ve fî 14 Şubat sene [1]300.