İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 240 Hüküm no: 246 Orijinal metin no: [73-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evraka yapıştırılan pulların kanununa uygun olarak iptal edilmesi Mâliye Nezâreti’nden Ma‘rûz-ı bende-i dîrîneleridir ki, Ba‘zı devâir-i resmiyede Rüsûm-ı Damga Kānûnu’nun on sekizinci maddesi ahkâmına tamamıyla ri‘âyet olunmayarak pulları lâyıkıyla ibtâl edilmemiş ve kıymetinden dûn evrâka yazılmış olan senedât vesâirenin kabûl edilmekde ve o misillü ibtâl edilmemiş pullar muahharan diğer evrâka yapışdırılarak yine isti‘mâl olunmakda olduğu anlaşılmış ve hatta geçenlerde Hakkâri vilâyeti dâhilinde vâki‘ Mahmudi kazâsı bidâyet mahkemesi ser-mustantık mu‘âvini Mehmed Efendi’nin evvelce isti‘mâl edilmiş olduğu hâlde hükm-i kānûna tevfîkan ibtâl edilmemiş pulları muahharan yine isti‘mâl ettiği mahkeme-i mezkûrece zâhire çıkarılarak mûmâ-ileyh hakkında hüküm lâhık olmuş ve kānûn-ı mezkûr ahkâmının icrâsına bu sûretle takayyüd edilmemesi damga vâridâtının ziyâ‘ını mûcib hâlâtdan bulunmuş olduğundan bu misillü hâlâtın men‘-i vukū‘u için takayyüdât-ı lâzımenin îfâsı husûsunun ta‘mîmen izbârı Düyûn-ı Umûmiye-i Osmâniye Vâridât-ı Mahsûsası İdâresi’nden vârid olan fî 14 Kânûn-ı sânî sene [1]300 târih ve iki yüz yirmi altı numaralı tezkiresi üzerine Vâridât İdâre-i Umûmiyesi’nden ifâde ve bi’l-cümle devâir-i resmiyeye teblîğ-i madde olunmağın Bâb-ı Vâlâ-yı Meşîhat-penâhîlerince dahi minvâl-i meşrûh üzere icrâ-yı îcâbı husûsunun lâzım gelenlere emr ü tenbîh buyurulması bâbında emr ü fermân hazret-i veliyyü’l-emrindir. Fî 7 Cumâdelûlâ sene 1302 ve fî 10 Şubat sene [1]300.