İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 241 Hüküm no: 247 Orijinal metin no: [73-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vekalet hüccetleri hakkındaki nizamnamenin yeniden düzenlendiği Makām-ı Meşîhat’den İstanbul Kādılığı’na Fazîletlü efendim hazretleri, Mehâkim-i Şer‘iyye Nizâmnâmesi’nin on dokuzuncu maddesi mûcebince sadreyn-i muhteremeyn cânibinden i‘tâsı lâzım gelen vekâlet hüccetlerinin mezkûr nizâmnâmenin otuz sekizinci maddesi makāmına kāim olmak üzere ta‘dîlen kaleme alınan madde-i nizâmiyeye yanlış ma‘nâ verilerek sâir mehâkim-i şer‘iye tarafından dahi tanzîm edilmekde olduğundan bastla sâlifü’z-zikr on dokuzuncu madde hükmüne ri‘âyet edilmesi zımnında Dersa‘âdet mehâkim-i şer‘iyesine teblîgāt icrâsı lüzûmuna dâir Anadolu kādıaskerleri semâhatlü efendi hazretleri tarafından verilen takrîrin leffiyle ahîren kaleme alınan madde-i nizâmiye Meclis-i Vükelâ karârıyla irâde-i seniyyeye müstenid ve tefsîr ve hall-i eşkâli Şûrâ-yı Devlet’e âid idiğinden îfâ-yı muktezâsı hakkında Meclis-i Tedkīkāt-ı şer‘iye ifadesiyle Şûrâ-yı Devlet Riyâset-i celîlesine yazılan tezkire-i senâverîye zeylen vârid olan cevâbda Rumeli ve Anadolu’da vâki‘ olup ashâbı Dersa‘âdet’de bulunan emlâkin nasb-ı vekîl hüccetlerinin Rumeli’de olanlar için Rumeli ve Anadolu’da bulunanlar için Anadolu kādıaskerlikleri taraflarından verilmesi Mehâkim-i Şer‘iyye Nizâmnâmesi’nin on dokuzuncu maddesinde musarrah bulunduğuna nazaran nizâmnâme-i mezkûrun otuz sekizinci maddesine kāim olmak üzere ta‘dîlen kaleme alınmış olan madde-i nizâmiyede münderic bi’l-cümle mehâkim-i şer‘iye ta‘bîrinden maksad taşra mehâkim-i şer‘iyesi olduğu cihetle ona göre tashîh-i mu‘âmelât olunması lüzûmu bi’l-havâle Tanzîmât Dâiresi’nden ifâde kılındığı iş‘âr olunarak Meclis-i Tedkīkāt ifâdesiyle lâzım gelenlere icrâ-yı teblîgāt edilmiş olmağla taraf-ı fâzılânelerinden dahi hükm-i nizâma muhâlif mu‘âmele îkā‘ olunmamasına i‘tinâ ve himmet ve mehâkim-i merbûta nüvvâbına da beyân-ı keyfiyet buyurulması siyâkında tezkire-i senâverî terkīm olundu. Fî 12 Receb sene [1]302 ve fî 15 Şubat sene [1]301.