İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 242 Hüküm no: 248 Orijinal metin no: [74-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hükümete ait daire ve binaların tamir ve inşasında belirlenenden fazla para harcanmaması Dâhiliye’den Taraf-ı âlî-yi hazret-i Meşîhat-penâhîye Ma‘rûz-ı bende-i dîrîneleridir ki, Hükûmete âid devâir ve ebniyenin ta‘mîrât ve inşââtında bi’l-istîzân mu‘ayyen olan mikdârdan fazla akçe sarf olunmaması Ebniye Nizâmnâmesi ahkâmından bulunduğu hâlde bunun hilâfında olarak ba‘zı mahallerce yine hükûmete âid inşâât ve ta‘mîrât için bilâ-istîzân akçe sarf edilmekde olarak bu hâlin devamı câiz olamayacağından ba‘de ezîn muhtâc-ı istîzân olan inşâât ve ta‘mîrâta bilâ-istîzân mübâşeret edilmek devâir-i lâzımeye te’kîden teblîği husûsuna Şûrâ-yı Devlet Dâhiliye Dâiresi’nden bâ-mazbata vukū‘ bulan ifâde üzerine bi’l-istîzân irâde-i seniyye-i cenâb-ı pâdişâhî müte‘allik ve şeref-sudûr buyrulduğu beyânıyla icrâ-yı îcâbı taraf-ı sâmî-i vekâlet-penâhîden bâ-tezkire emr ü iş‘âr buyurulmuş ve bu madde hakkında evvelce de şûrâ-yı mezkûrdan verilen mazbata üzerine bâ-irâde-i seniyye umûm vilâyâta icrâ-yı teblîgāt olunmuş olduğu gibi bu kerre devâir-i mukteziyeye dahi beyân-ı keyfiyet edilmiş olmağla taraf-ı âlî-i Fetvâ-penâhîlerince de irâde-i seniyye mantûk-ı münîfine tevfîk hareket buyurulması bâbında emr ü fermân hazret-i men-lehu’l-emrindir. Fî 21 Zilka‘de sene [1]298 ve fî 3 Teşrîn-i evvel sene [1]297.