İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 246 Hüküm no: 254 Orijinal metin no: [79-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muvazaa muamelesi uygulanmasına devam edilmesi Muvâza‘a usûlünün ilkāsı hakkında Vergi Emâneti’nden vukū‘ bulan teklîf onun devamını mûcib ad olunan iki sebebin mündefi‘ olacağına binâen edilmiş ise de Musakkafât ve Müstegallât-ı Mevkūfenin Tevsî‘-i İntikāli Kānûnu’nun ihtiyâra mu‘allakıyeti hasebiyle muvâza‘anın serbesti-yi isti‘mâl ve menâfi‘ için lüzûm-ı devamı zâil olmuş olunamayacağından başka müdâyenâtca dahi ferâğ bi’l-vefâ ve terhîn-i emlâk yoluna gitmeği istemeyenlerin muvâza‘ayı ihtiyâr etmesi ve ale’l-husûs cemâ‘at-i mezhebiyeye âid ve şirketlere mahsûs emâkân [emâkin] ve akārâtın hîn-i vakıfda? olan mahlûl kā‘idesini muhâfazaten mutlaka şahsı ismine geçirilmesi mecbûriyeti devam ettikçe muvâza‘anın dahi îcâb ve lüzûmu âşikâr olacağından teklîf-i mezkûrun ihtiyârında hasr-ı nazarla ahvâl-i meşrûha tamamıyla ber-taraf oluncaya kadar muvâza‘a mu‘âmelesinin devam-ı cereyânı husûsunun Vergi Emâneti’ne teblîğiyle Makām-ı Meşîhat-i Ulyâ’ya ve Adliye Nezâreti’ne ma‘lûmât verilmesi tezekkür kılınmağın ol bâbda emr u fermân hazret-i men-lehu’l-emrindir. Fî 14 Cemâziyelevvel sene 303, fî 6 Şubat sene 301.