İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 247 Hüküm no: 255 Orijinal metin no: [79-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damga Resmî Kanunu’na göre mahkeme, meclis ve diğer resmi dairelere verilen senedlere pul yapıştırılmasının zorunlu olduğu, yapıştırmayanlardan ceza alınacağı Ma‘rûz-ı bende-i dîrîneleridir ki, Resm-i Damga Kānûnu’nun yirmi ikinci maddesi hükmünce pul yapıştırılmamış olduğu hâlde mehâkime ve mecâlise ve sâir devâir-i resmiyeye ibrâz olunan senedâtdan resm-i nisbîye tâbi‘ olanlar için ahzı îcâb eden cezâ-yı nakdî ol senedde hâvî olduğu mebâliğin yüzde üçü mikdârına müsâvî olacak ise de resm-i maktû‘a tâbi‘ olan senedât ve sâire için cezâ ahzı lüzûmunda onun mikdârı yarım Osmanlı altınından üç Osmanlı altınına kadar mütefâvit olmasıyla bu makūle senedât ve sâire cezâ-i nakdîlerinin ta‘yîni bunların ahzı karârını veren mehâkim ve mecâlis ve sâir me’mûrîne âid bulunduğu ve ihtilâf olur ise düstûrun üçüncü cildinin doksan yedinci sahîfesinde münderic resm-i damga cezâ-yı nakdîsi nizâmnâmesinin mevâdd-ı mahsûsası mûcebince halli ve tesviyesi lâzım geldiği hâlde bazı mahallerce resm-i maktû‘a tâbi‘ senedât ve sâir cezâ-yı nakdîlerinin mücerred hâmillerinin istihsâl-i muvâfıkıyeti mütâla‘asıyla onun hafîf derecede ta‘yîn kılınmakta bulunduğu istihbâr edildiğinden ve ahkâm-ı kānûniyenin muhâfazasıyla hukūk-ı evvelinin adem-i izâ‘ası dahi bi’l-cümle me’mûrînin vezâif-i esâsîyesinden bulunduğundan işbu cezâ-yı nakdîlerinin o makūle pulsuz senedâtda münderic husûsâtın derece-i ehemmiyetle mütenâsiben takdîriyle hükm-i kānûnun muhâfaza-i ahkâmı esbâbının istikmâline be-gāyet dikkat ve i‘tinâ olunması ve ol bâbda Düyûn-ı Umûmiye-i Osmâniye Meclis İdâresi Komiserliği’yle cereyân eden muhâbere üzerine Vâridât İdâre-i Umûmiyesi’nin ifâdesiyle bi’l-cümle devâir ve vilâyâta icrâ-yı teblîgāt olunmuş olmağın Bâb-ı Vâlâ-yı Hazret-i Meşîhat-penâhîlerince dahi bu bâbda lâzım gelenlere vesâyâ-yı lâzıme icrâ buyurulması bâbında emr u fermân hazret-i men-lehu’l-emrindir. Fî 13 Cemâziyelevvel sene 1303, fî 5 Şubat sene 1301. Nâzır-ı Umûr-ı Mâliye Zihni