İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 248 Hüküm no: 256 Orijinal metin no: [80-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Telgraf ve Posta Nezareti’nin resmi dairelere ait eşyaların naklinden ücret almaması gerektiği Huzûr-ı Âlî-i Hazret-i Meşîhat-penâhî’ye Ma‘rûz-ı bende-i dîrîneleridir ki, Devâir-i emîriyeye âid eşyâ denkleri nakliyâtı ücretlerinden dolayı Mâliye Nezâretiyle Posta ve Telgraf Nezâreti beynlerinde tahaddüs eden ihtilâfa dâir evrâk ve ol bâbda vukū‘ bulan teblîgāta mebnî nezâret-i müşârün-ileyhâdan tanzîm ve irsâl olunan hesâb pusulaları üzerine Şûrâ-yı Devlet karârıyla teşkîl olunan komisyonca icrâ kılınan tedkīkātı mutazammın tanzîm olunan mazbata Şûrâ-yı mezkûra lede’l-havâle ol bâbda cereyân eden müzâkerâtı mutazammın Tanzîmât Dâiresi’nden kaleme alınan mazbatanın bir sûreti leffen irsâl-i sûy-ı sâmî-i meşîhat-penâhîleri kılındı. Hülâsa-i meâlinden eşyâ-yı mezkûrenin bilâ-ücret nakli iktizâ edeceğinin sûret-i kat‘iyyede Telgraf ve Posta Nezâreti’ne teblîği için Dâhiliye Nezâret-i celîlesine havâlesi ve Mâliye Nezâretiyle devâir-i sâireye de ma‘lûmât i‘tâsı tezekkür olunduğu gösterilmiş ve mûcebince nezâret-i müşârün-ileyhâ ile ta‘mîmen devâire iş‘âr-ı keyfiyet edilmiş olmağla taraf-ı âlî-i meşîhat-penâhîlerince dahi iktizâsının îfâsı bâbında emr u irâde hazret-i men-lehu’l-emrindir. Fî 15 Şa‘bân sene 1302 ve fî 18 Mayıs sene 1301. Said