İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 252 Hüküm no: 259 Orijinal metin no: [83-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vilayet ve livalardan Hazine ve diğer dairelere yazılacak poliçe ve senedlere pul yapıştırılması Ma‘rûz-ı dâ‘î-i dîrîneleridir ki, Vilâyât ve elviyeden Hazîne-i celîle ile devâir-i sâireye keşîde olunacak poliçelerle senedât-ı sâireye nizâmı vechile pul yapıştırılması için tafsîlât ve teferru‘âtının derciyle makām-ı âcizîden fî 13 Mayıs sene 97 târihinde devâir ve vilâyâta icrâ edilen teblîgāt-ı umûmiyeden dolayı Adliye Nezâret-i celîlesiyle cereyân eden muhâbere üzerine Hazînece olunan tedkīkāt hükmünce teblîgāt-ı mebhûsanın bir fıkrasında yüz aded sîm mecîdînin mahâll-i râyicine göre meselâ otuzar guruşdan hâsılı üç bin guruş olmak lâzım geleceğinden ve varaka-i sahîha ve pullar dahi guruş üzerine mahdûd idiğinden ol mikdâr mecîdînin kıymet-i hakīkiyesi bin dokuz yüz guruşdur denilerek iki bin guruşluk kâğıda yazılmayıp dört bin guruşluk varakaya tahrîr edilmesi lüzûmu gösterilmiş ise de râyic-i mahallîsi veyâhûd cins ve adedi tasrîh olunarak tanzîm kılınan senedâtın Meskûkât Karârnâmesi’ne tevfîkan kıymet-i hakīkiyesi nisbetinde ve râyic-i mahallî veyâ adedi gösterilmeyip ale’l-ıtlâk guruş üzerine murakkam olan senedâta dahi hâvî olduğu guruşun mikdârı nisbetinde pul yapıştırılması lâzım geleceğinin ta‘mîmen izbârı Encümen-i Mâliye karârıyla Vâridât-ı Umûmiye İdâre-i Umûmiyesi’nden ifâde ve taşralarla devâir-i sâireye teblîği hâlde olmağın Bâb-ı Vâlâ-yı Meşîhat-penâhîlerince dahi îfâ-yı muktezâsının lâzım gelenlere emr ü tenbîh buyurulması bâbında emr u fermân hazret-i men-lehu’l-emrindir. Fî 23 Receb sene 303 ve fî 16 Nisan sene 302. Umûr-ı Mâliye Nâzırı Zihni