İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 253 Hüküm no: 260 Orijinal metin no: [83-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahkeme ve meclislerden verilen ilâm ve hüküm mazbataları ile idare meclislerinden verilen mazbatalara pul yapıştırılmayacağı Ma‘rûz-ı dâ‘î-i dîrîneleridir ki, Ashâb-ı mesâlih yedlerine bidâyeten verilecek mezâbıt üzerine devâir-i âidesince isti‘lâma lüzûm görünen mevâd için tanzîm olunacak mezâbıt-ı cevâbîyenin pul resminden istisnâsı hakkında sebk eden arz u istîzân üzerine Şûrâ-yı Devlet Tanzîmât Dâiresi’nden tanzîm olunup sûret-i musaddakası 12 Mart sene 302 târihiyle buyruldu-yı âlî ile cânib-i hazîneye teblîğ buyrulan mazbatada Resm-i Damga Kānûnu’nun rüsûm-ı maktû‘a ta‘rîfesinde mehâkim ve mecâlisden bir mu‘ayyen meblağı hâvî olmayarak i‘tâ olunan i‘lâm ve hüküm mazbataları ile idâre meclislerinden ashâbı mesâlih yedlerine verilen mazbatalara on guruşluk pul yapıştırılmayacağı muharrer olmasına mebnî mesâlih-i zâtiyeye dâir mehâkim ve mecâlisden yazılacak her nev‘ mezâbıtın resm-i maktû‘a tâbi‘ olması tabî‘i olup ancak maslahatın âid olduğu devâirce usûlen istîzâhına lüzûm görünen cihatı için tanzîm olunacak mezâbıt-ı cevâbîye mahallerinin ma‘lûmât ve mu‘âmelâtını mutazammın olarak muhâberât-ı resmiyeden ma‘dûd olacağı ve bir iş için îcâbı hâlinde birkaç kere muhâbere cereyân edebileceği cihetle her def‘ası için başka başka pul resmi istifâsı muvâfık-ı ma‘delet olamayacağından ber-mûceb-i kānûn mesâlih-i zâtiyeye dâir bidâyeten tanzîm olunacak mezâbıtdan on guruşluk pul resmi istifâ edilmek üzere devâir-i müte‘allikasınca görülecek lüzûm üzerine vukū‘ bulacak istîzâhâta cevâben yapılacak mezâbıta pul yapıştırılmak îcâb etmeyeceği gösterilmiş olduğundan ber-mûceb-i karâr ve irâde îfâ-yı muktezâsı husûsunun bi’l-cümle devâir ve vilâyât ile elviye-i müstakille mutasarrıflarına Vâridât İdâre-i Umûmiyesi’nden ifâde ve ol vechile mahâll-i sâireye teblîğ-i hâlde kılınmağın Bâb-ı Vâlâ-yı Meşîhat-penâhîlerince de îfâ-yı muktezâsının lâzım gelenlere emr ü tenbîh buyurulması bâbında emr u fermân hazret-i men-lehu’l-emrindir. Fî 14 Receb sene 1303 ve fî 7 Nisan sene 1302. Umûr-ı Mâliye Nâzırı Mustafa Zihni