İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 253 Hüküm no: 261 Orijinal metin no: [83-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahsi işler için resmi dairelere yazılan tahrir, tezkire ve arzuhallere pul yapıştırılmasının zorunlu olduğundan pulsuz evraka işlem yapan memurların cezalandırılması Ma‘rûz-ı bende-i dîrîneleridir ki, Damga Kānûnu’nun yirmi altıncı maddesinde mesâlih-i zâtiye için pulsuz kâğıd üzerine makāmât-ı resmiyeye re’sen yazılan tezkire ve takrîr ve arzuhâlleri kabûl ile bir mahalle havâle eden ve mu‘âmele icrâ eyleyen me’mûrların herbirinden yirmişer Osmanlı altını cezâ-yı nakdî alınması muharrer ve me’mûrînin tercüme-i hâl varakaları ile rabtedecekleri sûretler mesâlih-i zâtiyeden ve binâen-aleyh madde-i mezkûrede beyân kılınan evrâk envâ‘ından olmağla bunlara üçer guruşluk pul vaz‘ etmeleri mukarrer olduğundan mikdâr-ı mu‘ayyeninden noksan pul yapıştırılmış olan evrâk sûretlerini kabûl ile bir mahalle havâle eden ve icrâ-i mu‘âmele eyleyen me’mûrînden dahi ikmâl-i noksan ettirildikden sonra bi’n-nisbe cezâ-yı nakdî ya‘ni bütün bütün pulsuz olur ise yarım altın cezâ-yı nakdî alınacağına nazaran bunun nisbetinden misillü nısf derecesinde noksan olur ise yirmi beş guruş alınması ve görülen lüzûm üzerine bir varakaya ihrâc edilen suver-i adîde bir kayd hükmünde olacağından ve cümlesi birden tasdîk olunacağından umûm için yalnız üç guruşluk pul vaz‘ı ile iktifâ olunması cânib-i Hazîne’den sebk eden arz ve iş‘âr üzerine Şûrâ-yı Devlet karârıyla şeref-vârid olan 28 Mayıs sene 302 târihiyle buyruldu-yı âlîde emr u iş‘âr buyurulmuş ve mûcebince îfâ-yı mu‘âmele olunması Vâridât İdâre-i Umûmiyesi’nin ifâdesine [84] bi’l-cümle vilâyât ve devâire bildirilmiş olmağın dâire-i aliyye-i fetvâ-penâhîlerince dahi îfâ-yı muktezâsının lâzım gelenlere emr ü tenbîh buyurulması bâbında emr u fermân hazret-i men-lehu’l-emrindir. Fî 24 Şevval sene 1303 ve fî 14 Temmuz sene 1302. Nâzır-ı Umûr-ı Mâliye Zihni