İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 254 Hüküm no: 263 Orijinal metin no: [84-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şire’de tutuklanan kalpazanın elindeki sahte Mecidilerin gönderilmesi ve kalpazan hakkında gerekli muamelenin yapılması Ma‘rûz-ı bende-i dîrîneleridir ki, Şire’de derdest edilen bir kalpazanın yedinde bulunup Atina Sefâret-i Seniyyesi’nden Hâriciye Nezâret-i celîlesine ve oradan cânib-i Hazîne’ye irsâl olunan kalb mecîdîlerden bir adedinin Meskûkât-ı Şâhâne İdâresince mu‘âyene ve vezn ü tahlîl ettirildikde vezni altı dirhem iki buçuk kırât ve terkîbât-ı mu‘ayyenesinin dahi tahmînen yüzde doksanı kalay ve yüzde onu antimondan mürekkeb kālıblarda izâ‘e olunmuş bir halîtadan ibâret olduğu gibi işbu kalb mecîdî ziyâde hafîf bulunduğu cihetle sahîhinden kolay fark olunacağı anlaşılmış idiğinden mîrîce ve ahâlîce o makūle kalb mecîdîler alınıp verilmek üzere takayyüdât-ı mukteziye îfâsı Vâridât İdâre-i Umûmiyesi’nde vukū‘ bulan ekall üzerine devâir-i ma‘lûme ile bi’l-cümle vilâyât ve müstakillen idâre olunan mutasarrıflara ve tutulan kalpazan hakkında mu‘âmele-i lâzımenin îfâ ettirilmesi nezâret-i müşârün-ileyhâya teblîğ kılınmağın Bâb-ı Vâlâ-yı Meşîhat-penâhîlerince de îfâ-yı muktezâsının lâzım gelenlere emr ü tenbîh buyurulması bâbında emr u fermân hazret-i veliyyü’l-emrindir. Fî-gurreti Zilka‘de sene 303, fî 20 Temmuz sene 302. Nâzır-ı Umûr-ı Mâliye Zihni