İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 259 Hüküm no: 271 Orijinal metin no: [89-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damga resmine tâbi olan tüm senetler ile diğer evraka yapıştırılan pulların sonradan kullanılmamaları için iptali Ma‘rûz-ı bende-i dîrîneleridir ki, Resm-i damgaya tâbi‘ bulunan kâffe-i senedât ve evrâk-ı sâireye yapıştırılacak pulların Damga Kānûnu’nda münderic madde-i mahsûsa mûcebince ibtâli hakkında Düyûn-ı Umûmiye-i Osmâniye Vâridât-ı Mahsûsası İdâresi’nden vukū‘ bulan iş‘âr ve sebk eden arz u istîzân üzerine Resm-i Damga Kānûnu’nun on sekizinci maddesinde bir pul iki def‘a isti‘mâl olmamak ve bir senedin pulu hîn-i temhîr ve imzâsında yapıştırılmış olduğu ma‘lûm olmak için [90] mühür veyâ imzâ ve târihin bir kısmı pulların yazıları bozmayacak sûretde üzerine tesâdüf ettirileceği ve pulların müte‘addid olduğu sûretde kezâlik her bir pulun bir mikdâr mahâlline târih veyâ mühür veyâ imzâ yürütülerek ibtâl edileceği muharrer olup kānûn-ı mezbûrun ahîren ta‘dîl olunan otuz üçüncü maddesine bilerek müsta‘mel pul kullananların Cezâ Kānûnnâmesi hükmünce dûçâr-ı mücâzât olacaklarına dâir sarâhat derc edilmiş olduğundan pulların ne yolda ibtâl edileceği herkesce ma‘lûm olmak ve pulları bu vechile ibtâl olmayan senedâta nizâmen damgasız i‘tibâr olmak üzere hükm-i kānûnun tasrîhiyle ibtâl kā‘idesinin gazetelerle i‘lânı münâsib olacağının Düyûn-ı Umûmiye İdâresi’ne teblîği Şûrâ-yı Devlet karârıyla müte‘allik buyrulan irâde-i aliyye iktizâ-yı âlîsinden olduğundan mûcebince idâre-i mezkûreye beyân-ı keyfiyetle olunan i‘lânın Vâridât İdâre-i Umûmiyesi ifâdesiyle leffen takdîm-i huzûr-ı sâmî-i cenâb-ı meşîhat-penâhîleri kılınan sûreti mütâla‘asından müstefâd olduğu üzere isti‘mâl olunacak pulların üzerine târih yürütüldükden sonra başka bir mikdâr mahâlline de mühür veyâ imzâ vaz‘ olunması lâzım geleceğinin ve keyfiyet her tarafa bildirilmek ve Bâb-ı Vâlâ-yı cenâb-ı meşîhat-penâhîlerince dahi ona göre îcâbının icrâ buyurulması bâbında emr u fermân hazret-i men-lehu’l-emrindir. Fî 26 Safer sene 1304 ve fî 11 Teşrîn-i sânî sene 302. Nâzır-ı Umûr-ı Mâliye Zühdü