İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 260 Hüküm no: 272 Orijinal metin no: [90-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damga resmine tâbi olan tüm senetler ile diğer evraka yapıştırılan pulların sonradan kullanılmamaları için iptali Resm-i damgaya tâbi‘ bulunan kâffe-i senedât ve evrâk-ı sâireye yapıştırılacak pulların üzerlerine Damga Kānûnu’nun on sekizinci maddesinde gösterildiği vechile hem târihin ve hem de imzâ veyâ mührün birer kısmı yürütülerek bu sûretle ibtâli iktizâ eder iken ekser mahallerde işbu ibtâl mu‘âmelesi madde-i mezkûre ahkâmı hilâfında cereyân eylemekde olduğuna mebnî ba‘demâ ahkâm-ı kānûniye her tarafda seyyânen ve harfiyyen cereyân ederek bu sebeble ashâbının cezâ-yı nakdî i‘tâsıyla mutazarrır olmalarına mahâl kalmamak için ol bâbda Şûrâ-yı Devletce verilen karâr üzerine ber-vech-i âtî ta‘rîfât-ı icrâsı münâsib görülmüşdür, şöyle ki evvelâ zikrolunan evrâk ve senedâtın metinleri yazıldıktan sonra târih ve imzâ konulmaksızın ve mühürlenmeksizin kānûnen lâzım gelen mikdârda olmak üzere tedârik edilecek pullar ol senedât ve evrâkın târih ve imzâ konulmak veyâ mühür basılmak lâzım mahâll-i ma‘rûfa yapıştırılıp ba‘dehû hem târihin ve hem de imzânın veyâhûd mührün birer kısmı mutlaka pullar üzerine isâbet ettirilerek ol sûretle ibtâl kılınacaktır, sâniyen pullar müte‘addid olduğu sûretde târih ve imzâ veyâhûd mührün birer kısmı yürütülüp pulların kâffesi bunlarla ibtâl edilecekdir, sâlisen pullar bâlâda ta‘rîf olunduğu vechile ya‘ni hem târihin ve hem de imzâ veyâhûd mührün birer kısmıyla ibtâl olunmamış olan senedât ve evrâk-ı sâire kānûnen pulsuz i‘tibâr edilip hâmilleri haklarında lâzım gelen mu‘âmele-i cezâiye icrâ olunacakdır.