İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 261 Hüküm no: 274 Orijinal metin no: [93-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehbenderler tarafından verilecek pasaport, mürur tezkiresi, tabiiyet ilmühaberi ve diğer evrak ile tasdik olunan senetlere şehbenderhanelere mahsus pulun yapıştırılması Ma‘rûz-ı dîrîneleridir ki, Muvazzaf ve fahrî şehbenderler tarafından verilecek pasaport ve mürûr tezkiresi ve tâbi‘iyet ilmühaberi ve evrâk-ı resmiye-i sâire ile li-ecli’t-tasdîk imzâ olunacak senedât ve evrâk-ı sâirenin kâffesinden ahz olunan resmin mikdârına göre pul yapıştırılması ve evrâk-ı mezkûreye pul yapıştırılmadığı hâlde mu‘teber tutulmayarak alâkadârlara terettüb eden zarar ve ziyândan şehbenderlerin mesûl tutulması ve haklarında icrâ-[yı] mücâzât olunması şehbenderler nizâmnâmesi iktizâsından olduğu hâlde bazı şehbenderler tarafından evrâk-ı mezkûreye alınan resm mukābilinde pul yapıştırılmamakta olduğu ve devâir-i resmiye ve mehâkim-i Osmâniye’ye ibrâz olunan bu misillü pulsuz evrâk Rüsûmât Emânet-i Behiyyesi’nden mâ‘adâ devâirden ma‘lûmât verilmemekte olduğundan mugāyir-i nizâm harekete cür’et eden şehbenderler mesûl tutulamadığı beyânıyla işbu sû-i isti‘mâlâtın önü alınmak üzere şehbenderhânelerden i‘tâ ve imzâ olunan bi’l-cümle evrâkdan istifâ edilecek resmin mikdârına göre şehbenderhânelere mahsûs pul yapıştırılacağının ve pulsuz evrâkın devâir ve mehâkimce mu‘teber tutulmayacağının gazetelerle neşr ve i‘lân edilmiş ve keyfiyetin umûm devâir ve vilâyâta iş‘ârıyla beraber ele geçirilen pulsuz evrâkın dâire-i hâriciyeye gönderilmesi lüzûmu Hâriciye Nezâret-i celîlesinden bâ-tezkire izbâr olunmuş ve sûret-i hâl lâzım gelenlere bildirilmiş olmağla Bâb-ı Vâlâ-yı Meşîhat-penâhîlerince dahi îcâb-ı hâlin îfâsı bâbında emr u irâde hazret-i men-lehu’l-emrindir. Fî 23 Rebî‘ülevvel sene 304 ve fî 8 Kânûn-ı evvel sene 302. Sadrıa‘zam Kâmil