İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 262 Hüküm no: 275 Orijinal metin no: [93-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borç ve diğer senetlerin arka ve altına kefiller tarafından yazılan şerhlere pul yapıştırılmasına gerek olmadığı Ma‘rûz-ı bende-i dîrîneleridir ki, Resm-i damga kānûnunun dördüncü ve beşinci maddeleri tagayyür edilerek ekser mahallerde tanzîm ve te‘âtî olunan düyûn ve sâire senedâtının zahr ve hâmişine küfelâ taraflarından yazılan şerhlere on guruşluk pul yapıştırılmayıp asıl senedde olan nisbî pulun kâfi ad edilmesinden ve sâireden dolayı [Düyûn-ı] Umûmiye Vâridât-ı Mahsûsası İdâresi’nden vukū‘ bulan mürâca‘at ve ol bâbda makām-ı âcizîden sebk eden istîzân üzerine Şûrâ-yı Devlet’e lede’l-havâle resm-i damga kānûnunun beşinci maddesinde bir senedde münderic olan mu‘âmele birkaç ciheti şâmil olmadığı takdîrde en ziyâde resm istifâsını müstelzim olan cihete i‘tibâr olacağı mezkûr ise de hükm-i kānûna müttebian birkaç ciheti şâmil olan senedât hakkında olup kānûn-ı mezbûrun rüsûm-ı maktû‘a ta‘rifesinde ale’l-ıtlâk kefâletnâmelere on guruşluk pul vaz‘ olunacağı muharrer olmasına ve kefâletnâmelerin re’sen tanzîm edilmesiyle deyn senedinin hâmişine yazılması bâbında hükmen hiçbir guruş olmamasına nazaran o misillü senedâtın resm-i nisbîsi her kaç guruş ise ona göre pullar vaz‘ ve ibtâl edildikden sonra hâmişindeki kefâletnâme zeyline dahi re’sen tanzîm olunan kefâletnâmeler gibi on guruşluk pul yapıştırılmak tabî‘i olmağla gerek âdî deyn senedlerince ve gerek iltizâm mu‘âmelâtınca mu‘âmele icrâsı şûrâ-yı mezkûrca tezekkür ve tensîb ve keyfiyet Dâhiliye Nezâret-i celîlesine dahi teblîğ kılındığı beyân-ı âlîsiyle Hazînece de îfâ-yı muktezâsı şeref-vârid olan 9 Teşrîn-i sânî sene 302 târihiyle buyruldu-yı sâmîde irâde buyurulmuş olduğundan mantûk-ı münîfine tevfîk-i hareket olunması husûsunun bi’l-cümle vilâyât ile elviye-i müstakille mutasarrıflıklarına ve kâffe-i devâire izbârı Vâridât İdâre-i Umûmiyesi’nden ifâde ve her tarafa teblîğ-i madde olunmağın oraca dahi ber-minvâl-i muharrer icrâ-yı îcâbı bâbında emr u fermân hazret-i veliyyü’l-emrindir. Fî 8 Rebî‘ülâhir sene 304 ve fî 22 Kânûn-ı evvel sene 302. Nâzır-ı Umûr-ı Mâliye