İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 264 Hüküm no: 277 Orijinal metin no: [94-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Telgraf ve Posta Nezareti Tahrirat kâtiplerinden Ömer Bey’e tebdil-i hava aldığı zamanda nasıl maaş verileceği Ma‘rûz-ı bende-i dîrîneleridir ki, Telgraf ve Posta Nezâreti Tahrîrât Kalemi ketebesinden olup tebdîl-i hava zımnında üç ay me’zûniyetle Samsun’a azîmet etmiş olan Ömer Bey’in müddet-i me’zûniyeti bi’d-defe‘ât temdîd ile iki seneye iblâğ edilmiş iken iktisâb-ı âfiyet edemediğinden bahisle Dersa‘âdet’e avdet ve kalemine müdâvemet etmemesine mebnî yerine vekîl tedârik olunarak nısf maâş vekîle ve nısf-ı diğeri kendisine verilmekte bulunmuş ise de mûmâ-ileyhin müddet-i gaybûbeti bundan böyle dahi imtidâd eder ise almakta olduğu nısf maâş hakkında ne mu‘âmele edilmek lâzım geleceği istîzânına dâir nezâret-i müşârün-ileyhâdan vukū‘ bulan iş‘âr üzerine Şûrâ-yı Devlet Tanzîmât Dâiresi’nden kaleme alınıp Meclis-i Mahsûs-ı Vükelâ’da kırâet ve mütâla‘a olunan mazbatada vâkı‘an bir me’mûr hastalanıp da tedâvi ve tebdîl-i havaya ihtiyâcı etibbâ tarafından varaka-i resmiye ile tasdîk olunur ise ol me’mûra müddet-i münâsibe ile me’zûniyet-i resmiye i‘tâ olunacağı ve müddet-i me’zûniyetde maâşının tâm olarak verileceği harcırâh karârnâmesinin on üçüncü maddesinde muharrer olduğu hâlde hastalığı senelerce imtidâd edenlerin maâşı hakkında sarâhat-i kānûniye olmadığı ve bu misillülere bilâ-kayd u şart maâş i‘tâsı câiz olamayacağı cihetle mezkûr karârnâme hükmünce tebdîl-i hava zımnında me’zûn olup da müddet-i me’zûniyeti zarfında iâde-i âfiyet edemeyenlerin me’zûniyeti îcâbına göre müddet-i asliyenin nihâyet bir misli derecesine kadar temdîd olunarak bu müddet zarfında dahi iâde-i âfiyetle devam edemediği hâlde Tekā‘üd Sandığı’ndan kānûn dâiresinde istifâdeye da‘vet olunarak umûr-ı devletin seketeden vikāyesi için yerine âharının ta‘yîni ve şu kadar ki tebdîl-i hava için me’zûn olup da umûr-ı me’mûresinin vekîl ma‘rifetiyle rü’yeti lâ-büd olanlara nısf maâş i‘tâsıyla nısf-ı diğerinin vekîle verilmesi hakkında ittihâz edilen karâr re’sen me’mûrînden olup da vekîl ta‘yîn kılınmadığı hâlde vazîfesi mu‘attal kalacaklar hakkında olup bunun meclis a‘zâsı ve kalem ketebesi gibi vezâif-i müştereke ashâbına adem-i şümûlü mukarrer olmağla me’zûn olan o misillü me’mûrînin müddet-i me’zûniyetleri maâşının tâm olarak i‘tâsı lâzım geleceğinin ta‘mîmen devâir ve vilâyâta teblîğinin ve mûmâ-ileyh Ömer Bey’in fıkra-i ahîrede istisnâ olan ketebe-i aklâmdan olmak hasebiyle maâşının müddet-i me’zûniyeti zarfında tâm olarak tesviyesi îcâb eyler ise de kā‘ide-i meşrûha iktizâsınca bir daha temdîd-i müddet-i me’zûniyeti câiz olamayacağından bundan böyle dahi gelemeyecek hâlde ise ber-vech-i muharrer Tekā‘üd Sandığı’ndan istifâdeye terğîb ile maâşının kat‘ı husûsunun nezâret-i müşârün-ileyhâya bildirilmesi tezekkür olunduğu ve sûret-i muharrere münâsib ve maslahata muvâfık görüldüğü beyân-ı âlîsiyle ol vechile icrâ-yı îcâbı şeref-vârid olan tezkire-i sâmîye-i cenâb-ı sadâret-penâhîde emr u irâde buyurulmuş ve ber-mûceb-i karâr ve irâde-i aliyye nezâret-i müşârün-ileyhâya ve sâir iktizâ edenlere teblîgāt-ı lâzıme icrâ kılınmış olmağla Bâb-ı Vâlâ-yı Fetvâ-penâhîlerince de ba‘demâ ol vechile îfâ-yı mu‘âmele-i lâzımeye himem-i aliyye-i fetvâ-penâhîleri derkâr buyurulmak bâbında emr u fermân hazret-i men-lehu’l-emrindir. Fî 9 Rebî‘ülâhir sene 1304 ve fî 23 Kânûn-ı evvel sene 302. Nâzır-ı Umûr-ı Dâhiliye Münir