İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 265 Hüküm no: 278 Orijinal metin no: [95-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Postaya verilen emanetlerin zâyi olması durumunda posta idaresinden tazminat alınması Ma‘rûz-ı bende-i dîrîneleridir ki, Postalara tevdî‘ olunup posta eşkıyâ tarafından urulmak takrîbiyle veyâhûd sâir sûretle zâyi‘ olarak posta idâresinden tazmîn edilen emânât-ı mîrîye hakkında Posta ve Telgraf Nezâret-i Aliyyesi’nden iş‘âr üzerine makām-ı âcizî ile olunan muhâbere cevâbında gösterildiği vechile posta idâresinin fazla-i vâridât ve mesârifâtı Hazîne-i Mâliye’ye âid olmasına göre o yolda zâyi‘ olan emânât-ı emîriye için posta idâresinden tazmînât ahzı bir kîseden diğer kîseye akçe nakli gibi bir mu‘âmeleden ibâret kalacağı cihetle ba‘demâ devâir-i emîriye emânâtının mücerred postanın eşkıyâ tarafından urulması gibi bir hâlden dolayı ziyâ‘ı takdîrinde tazmîni husûsunda bâdîlerinden tahsîline ta‘lîkan îrâd ve masraf vechile icrâ-yı mahsûbu Şûrâ-yı Devlet Tanzîmât Dâiresi karârıyla Dâhiliye Nezâret-i celîlesine bildirildiği beyân-ı âlîsiyle Hazînece dahi îfâ-yı muktezâsı şeref-vârid olan fî 13 Teşrîn-i sânî sene 302 târihli buyruldu-yı sâmîde emr u irâde buyrularak keyfiyet Vâridât İdâre-i Umûmiyesi’nin teblîğiyle bâ-tezâkir-i âcizî devâir-i sâireye bildirilmeğin Bâb-ı Vâlâ-yı Meşîhat-penâhîlerince îcâbının icrâsı bâbında emr u fermân hazret-i veliyyü’l-emrindir. Fî 17 Rebî‘ülâhir sene 304, fî 31 Kânûn-ı evvel sene 1302. Nâzır-ı Umûr-ı Mâliye Zühdü