İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 266 Hüküm no: 279 Orijinal metin no: [95-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristiyanların evlilik izinnamelerinden resm alınmasına Rum ve Ermeni patrikhânelerinin itirazı Ma‘rûz-ı bende-i dîrîneleridir ki, İzmir’de cemâ‘at-i muhtelife rüesâ-yı rûhâniyesi tarafından i‘tâ olunan münâkahât izinnâmeleri âdî kâğıd üzerine tahrîr olunduğu ve ahâlî-i Müslime münâkahât izinnâmeleri ise resm-i damga kānûnu mûcebince on guruşluk resme tâbi‘ bulunduğu cihetle rüesâ-yı mûmâ-ileyhin dahi kānûn-ı mezkûr ahkâmına tevfikan hareket eylemeleri lâzım geleceği hakkında vukū‘ bulan iş‘âr üzerine Rum ve Ermeni Patrikhâneleri tarafından i‘tirâzı hâvî verilen iki kıt‘a takrîr ve ol bâbda Adliye ve Mezâhib Nezâret-i Celîlesiyle muhâberesi tezkirenin irsâliyle istifsâr-ı mu‘âmeleye dâir Mâliye Nezâret-i Celîlesi makāmından vârid olan tezkire üzerine Şûrâ-yı Devlet Tanzîmât Dâiresi’nden tanzîm ve i‘tâ olunan mazbatada mevzû‘-ı bahis olan izinnâmelerin resm-i damgaya teb‘iyeti kānûn iktizâsından olup bu def‘a münâkahât-ı İslâmiye evrâkının lede’l-hâce mehâkime ibrâz olunur evrâkdan olmasından neşet etmiş ise de Hıristiyan münâkahâtı kilisece sırf rûhânî ahkâm tahtında icrâ olunduğu ve ol bâbda tutulan zabıtnâmeler kilise evrâkından olarak mehâkimde dolaşır evrâkdan olmadığı cihetle patrikhânelerce dermeyân olunan ma‘zeret muvâfık-ı maslahat olup ancak münâkahât-ı gayr-ı İslâmiye için böyle bir istisnâ ile kānûna tagayyür gelmemek için resm-i mezkûrun izinnâme mukābili alınmayıp nüfûs-ı gayr-ı Müslime münâkahâtı nâmına nüfûs idâresinden verilen ilmühaberlerin harcına zamîmeten istihsâliyle Düyûn-ı Umûmiye İdâresi’ne teslîm edilmesinin usûl ittihâzı tezekkür olunduğu gösterilmesine ve bu sûret muvâfık-ı maslahat görünmesine binâen resm-i mezkûrun nüfûs-ı gayr-ı Müslime münâkahâtı nâmına nüfûs idâresinden verilen ilmühaberlerin harcına zamîmeten istifâ edileceğinin patrikhânelere teblîği 21 Ca sene 303 târihinde Meclis-i Mahsûs-ı Vükelâ karârıyla Adliye ve Mezâhib Nezâret-i celîlesine bildirilmiş idi. Bu kere gösterilen lüzûma mebnî karâr-ı vâki‘ Mâliye ve Dâhiliye Nezâret-i celîlelerine dahi bildirilmiş olmağla Bâb-ı Vâlâ-yı Fetvâ-penâhîlerince de ma‘lûmât olmak ve ona göre îfâ-yı mu‘âmele olunmak üzere iş‘âr-ı karâra ibtidâr olunmağın ol bâbda emr u irâde hazret-i men-lehu’l-emrindir. Fî 20 Cemâziyelevvel sene 1304 ve fî 2 Şubat sene 1302. Sadrıa‘zam Kâmil