İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 266 Hüküm no: 280 Orijinal metin no: [95-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damga resmine tâbi senetler ile bazı evraklara yapıştırılan pulların iptali Ma‘rûz-ı bende-i dîrîneleridir ki, Resm-i damgaya tâbi‘ kâffe-i senedât ve evrâk-ı sâireye yapıştırılacak pulların ne yolda ibtâl edileceği herkesce ma‘lûm olmak ve pulları bu vechile ibtâl olmayan senedât damgasız i‘tibâr kılınmak üzere hükm-i kānûnda tasrîh olunarak ibtâl kā‘idesinin sûret-i icrâsı gazetelerle i‘lân edilmiş ise de bir senedin pulu hîn-i temhîr ve imzâsında yapıştırılmış olduğu ma‘lûm olmak için pulların üzerine târih yürütüldükde başka bir mikdâr mahâlline de mühür veyâ imzânın pulların yazılarını bozmayacak sûretde üzerine tesâdüf ettirilmesi lâzım gelip hâlbuki bazı tüccâr ile bankaların evrâk ve senedâtında târih bâlâ-yı varakada matbû‘ olduğu cihetle bunlara yapıştırılan pullara yalnız imzâ vaz‘ıyla iktifâ olunarak bu da pulları nizâmı vechile ibtâl edemediğinden ve bu gibi târihi yukarısında matbû‘ senedâtda bâlâdaki târihi yine kalmak üzere zîrine yapıştırılacak pulların üzerine imzâ ile beraber bir târih yürütülmesinde bir be’is görülemediği gibi zîrindeki târih ibtâle mahsûs bulunacağı cihetle hükm-i nizâm dahi muhâfaza edilmiş olacağından bu misillü senedât hakkında o yolda mu‘âmele edilmesi Düyûn-ı Umûmiye Vâridât-ı Mahsûsası İdâresi’nden vukū‘ bulan iş‘âr ve makām-ı nezâretde sebk eden istîzân üzerine Şûrâ-yı Devlet Tanzîmât Dâiresi’nden [96] tanzîm ve icrâ-yı îcâbı zımnında bâ-buyruldu-yı âlî cânib-i hazîneye teblîğ olunan mazbata sûretinde gösterilmiş ve Muhâsebe-i Umûmiye-i Mâliye’nin ifâdesiyle devâir-i âliye ve vilâyât-ı celîle ile elviye-i müstakilleye beyân-ı keyfiyetde olunduğu gibi idâre-i mezkûreye dahi ma‘lûmât verilmiş olmağın Bâb-ı Vâlâ-yı Meşîhat-penâhîlerince dahi ol vechile îfâ-yı muktezâsının îcâb edenlere emr ü tenbîh buyurulması bâbında emr u fermân hazret-i veliyyü’l-emrindir. Fî 29 Cemâziyelâhire sene 304, fî 12 Mayıs sene 303. Nâzır-ı Umûr-ı Mâliye Zühdü