İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 268 Hüküm no: 282 Orijinal metin no: [96-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Bab Mahkemesi kâtiplerinin, görevine devam etmediği halde maaş almaya devam eden Kâtip Sadullah Efendi’nin görevine son verilmesini istemeleri Dârü’l-hilâfeti’l-aliyye Kādılığı Cânib-i Âlîsi’ne, Müdâvimi bulunduğumuz İstanbul Bâb Mahkemesi ketebesinden Sadullah Efendi’nin mahkemeye hilâf-ı rızâ-yı âlî olarak devam etmediğinden başka mahkemeyi kendiye me’kel ittihâz ederek muhassasât-ı dâ‘iyânemiz miyânında olan ma‘lûmü’l-mikdâr maâşının çıkdıkça mahkemeye gelerek ahz u istifâ etmekte olduğundan ve meşhûd olan ahvâl-i nâ-marziye ve etvâr-ı gayr-ı lâyıkasından dolayı cümlemiz kendisinden müte’ezzi ve müteneffir olduğumuzdan mâ‘adâ kendisinin bundan akdem mahkemeye devamı hakkında fazîletlü nâib efendi taraflarından bi’d-defe‘ât tenbîhât-ı şedîde ve müessire icrâ kılınmış ise de asla ısgā etmeyip el-hâletü hâzihî adem-i devamda bulunduğu tutulan jurnallerden dahi müstebân kılınacağından şu hâlde mezbûrun ahvâl-i sâbıkā ve adem-i devamına binâen kaydının terkīniyle maâşının usûlü dâiresinde tevzî‘ ve taksîminin icrâsı husûsunun makām-ı mu‘allâ-yı meşîhat-penâhîye bâ-müzekkire arz ve inbâ buyurulması siyâkında işbu mazbata-i dâ‘iyânemiz bi’t-tanzîm takdîmine ictisâr kılındı, ol bâbda emr u irâde hazret-i men-lehu’l-emrindir. Fî 27 Zilka‘de sene 304. An-ketebei mahkeme-i mezkûr: es-Seyyid Mehmed Sâdık, Mesud, Ahmed, Rıza, Salih, Macid, eş-Şeyh Abdülaziz, Tevfik, Vehbi, Mustafa Âsım. Ketebe-i mûmâ-ileyhimin işbu mazbatası muvâfık-ı maslahat görülmekle tasdîk kılındı. Ser-kâtib-i mahkeme Ziyaeddin, Kâtib-i vekāyi‘-i İstanbul Halid, Mukayyid-i mahkeme Mehmed Rüşdü. [97] Huzûr-ı Sâmî-i Hazret-i Fetvâ-penâhî’ye, Bazı ifâde ve istid‘âyı şâmil İstanbul Bâb Mahkeme-i Şer‘iyyesi ketebesi dâ‘îleri tarafından tanzîm ve hâk-pây-ı âlî-i cenâb-ı meşîhat-penâhîlerine li-ecli’t-takdîm taraf-ı dâ‘iyâneme verilmiş olan bir kıt‘a mazbata manzûr-ı âlî-i hazret-i veliyyü’n-ni‘amîleri buyurulmak üzere leffen takdîm kılınmış ve icrâ-yı îcâbı menût-ı irâde-i aliyye-i hazret-i fetvâ-penâhîleri bulunmuş olmağla ol bâbda emr u fermân hazret-i veliyyü’l-emrindir. Fî-gurreti Zilhicce sene 304. Kādı-i Dârü’l-hilâfeti’l-aliyye Mûcebince icrâsı kayd şüd. Takdîm-i hülâsa: 1/1010 [98. sayfa boştur]