İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 269 Hüküm no: 283 Orijinal metin no: [99-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Herkesin resmi muamelelerde nüfus tezkiresi ibraz etmesinin zorunlu olduğu Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Her şahıs emvâl-i gayr-ı menkūle bey‘ ü ferâğ ve intikālinde ve bir me’mûriyet ve hizmete intihâbında ve polis mu‘âmelâtında ve mürûr tezkiresi ve pasaport ahzında ve münâkahâtda nüfûs tezkiresi ibrâz etmeğe mecbûr olup göstermediği hâlde sicill-i nüfûsa kaydolunduğunu mübeyyin tezkire ahz edinceye kadar husûsât-ı mezkûrenin icrâsı te’hîr edilmesi Nüfûs Nizâmnâmesi’nin dördüncü maddesi ahkâmından olduğu hâlde bazı mahallerde buralara ri‘âyet edilmediği tahkīk kılındığından bahisle ba‘demâ muhâfaza-i ahkâm-ı nizâmiyeye i‘tinâ olunmasının îcâb edenlere teblîği lüzûmunun ta‘mîmen devâir ve vilâyât ile elviye-i müstakilleye izbârı Sicill-i Nüfûs İdâre-i Umûmiyesi’nden bâ-tezkire ifâde olunarak îcâbı icrâ kılınmış ve ahkâm-ı nizâmiyenin tatarruk-ı halelden vikāyesi lüzûmu derkâr bulunmuş olmasıyla dâire-i fetvâ-penâhîlerince de bu misillü muhîll-i nizâm ahvâl vukū‘a getirilmemesi esbâbının istihsâline himem-i aliyye-i meşîhat-penâhîleri derkâr buyurulmak bâbında emr u fermân hazret-i men-lehu’l-emrindir. Fî 9 Rebî‘ülâhir sene 305 ve fî 12 Kânûn-ı evvel sene 303 Nâzır-ı Umûr-ı Dâhiliye Münir