İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 270 Hüküm no: 284 Orijinal metin no: [99-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şer‘iye ve Nizamiye mahkemeleri görevlerinin ayrılması Mehâkim-i şer‘iye ve nizâmiye vezâifinin tefrîk olunmamasından mütehaddis müşkilât gittikçe tezâyüd etmekte olduğundan vezâif-i mezkûrenin tefrîk ve ta‘yîni lâzımeden görünmesine mebnî şer‘an fasl u hasmı îcâb eden de‘âvîden talâk, nikâh, nafaka, hıdâne, hürriyet, rıkkıyet, kısas, diyet, erş, gurre, hükûmet-i adl, kasâme, gāib, mefkūd, vasiyyet ve miras da‘vâlarının mehâkim-i şer‘iyede ve ticâret ve cezâ ve bilâ-devr güzeşte ve nizâmen lâzım gelen zarar ve ziyân ve iltizâm bedelâtıyla konturato da‘vâlarının dahi mehâkim-i nizâmiyede fasl ü rü’yeti ve bunlardan mâ‘adâsının tarafeyn râzı oldukları hâlde mehâkim-i şer‘iyede ve olmadıkları sûretde mehâkim-i nizâmiyede rü’yet ve fasl edilmesi husûsuna Meclis-i Mahsûs-ı Vükelâ karârıyla bi’l-istîzân irâde-i seniyye-i cenâb-ı pâdişâhî şeref-müte‘allik buyrularak Adliye Nezâret-i celîlesine iş‘âr-ı keyfiyet edilmekle Bâb-ı Vâlâ-yı Fetvâ-penâhîlerince de ber-mantûk-ı emr u fermân-ı hümâyûn îfâ-yı mu‘âmeleye himem-i aliyye-i meşîhat-penâhîleri derkâr buyurulmak bâbında emr u irâde hazret-i men-lehu’l-emrindir. Fî 24 Cemâziyelâhire sene 1305 ve fî 24 Şubat sene 1303.