İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 277 Hüküm no: 293 Orijinal metin no: [102-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damga Resmî Nizamnamesi’ne zeyl olarak çıkarılan mevadd-ı nizâmiye sureti Taraf-ı Vâlâ-yı Meşîhat-penâhî’ye, Ma‘rûz-ı bende-i dîrîneleridir ki, Resm-i Damga Nizâmnâmesi’ne tezyîl edilip Meclis-i Mahsûs-ı Vükelâca tashîh ve tensîb olunan ve bi’l-istîzân mer‘iyyet-i ahkâmına irâde-i seniyye-i hazret-i pâdişâhî şeref-müte‘allik buyrulan mevâdd-ı nizâmiyenin Dîvân-ı Hümâyûn Kalemince mu‘âmele-i kaydiyesi bi’l-icrâ i‘tâ olunan sûret-i musaddakalarından ikisi neşr ve i‘lân olmak üzere muhâkeme ve Matbû‘ât İdâresi’ne verilmiş ve diğerleri dahi devâir-i müte‘allikasına irsâl kılınmış olduğu gibi bir kıt‘a senede leffen taraf-ı âlî-i meşîhat-penâhîlerine gönderilmiş olmağın infâz-ı ahkâmına himem-i aliyye-i fetvâ-penâhîleri masrûf buyurulmak bâbında emr u irâde hazret-i men-lehu’l-emrindir. Fî 27 Zilka‘de sene 305, fî 24 Temmuz sene 1304. Sadrıa‘zam Kâmil Damga Nizâmnâmesi’ne zeyl olmak üzere kaleme alınıp mer‘iyyet-i ahkâmına bi’l-istîzân irâde-i seniyye-i cenâb-ı pâdişâhî şeref-müte‘allik buyurulmuş olan mevâdd-ı nizâmiye sûretidir. Birinci madde: Bi’l-cümle emlâk ve akārın ferâğ ve intikāl mu‘âmelâtına dâir tanzîm edilen zabıtnâmeler binde yirmi para resm-i nisbîye ve âid oldukları idâreler tarafından i‘tâ kılınmakta olan pasaportlarla sayd-ı berrî ve bahrî tezâkiri maktû‘an üçer ve mürûr tezkireleri kezâlik maktû‘an birer guruşluk pu[l] resmine tâbi‘dir. İkinci madde: Her nev‘ rüsûm ve tekâlîf ve verginin ahz u kabzını mübeyyin devâir-i resmiye ile mâl sandıklarından ve emvâl-i emîriye mültezimleri taraflarından i‘tâ olunmakta bulunan makbûz ve ibrâ senedleri ve ale’l-umûm mükellefînin berâetlerine müte‘allik her nev‘ ibrâ senedâtı el-yevm ma‘mûlün-bih olan damga kānûnunun [103] ikinci maddesi ahkâmını ta‘dîlen mükellefîn taraflarından tesviye olunmak üzere yüz guruşa kadar meblağı hâvî olanlar on paralık ve yüz guruşdan ziyâde bir meblağı şâmil bulunanları dahi yirmi paralık pul resmine tâbi‘ olacaktır. Üçüncü madde: Bâlâda zikr u beyân olunan evrâk ve senedâta yapıştırılacak pul üzerine her birinin nev‘ine göre emlâk ve akārın ferâğ ve intikālini mübeyyin senedât zabıtnâmelerine mahsûsdur, devâir-i resmiye makbûzâtına mahsûsdur ve mürûr ve pasaport ve şikâr ve sayd-ı mâhîye mahsûsdur, ibâreler yazılacakdır. Fî 17 Zilka‘de sene 305, fî 14 Temmuz sene 304. Aslına mutâbıkdır.