İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 278 Hüküm no: 294 Orijinal metin no: [103-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefalet Nizamnamesi sekizinci maddesinin tadil edilmesi Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Kefâlet Nizâmnâmesi’nin sekizinci maddesi makāmına kāim olmak üzere Şûrâ-yı Devlet Tanzîmât Dâiresi’nden ta‘dîlen kaleme alınıp Meclis-i Mahsûs-ı Vükelâca ba‘de’t-tashîh mer‘iyyet-i ahkâmına bi’l-istîzân irâde-i seniyye-i cenâb-ı pâdişâhî şeref-müte‘allik buyrulan ve bâ-tezkire-i sâmîye Hazîne-i Celîle’ye teblîğ olunan madde-i nizâmiyenin sûreti Tahsîsât-ı Mâliye İdâresi ifâdesiyle leffen huzûr-ı âlî-i fetvâ-penâhîlerine takdîm olunmağla infâz-ı ahkâm-ı münderecesine i‘tinâ olunmasının îcâb edenlere emr ü tenbîhi husûsuna müsâ‘ade-i aliyye-i meşîhat-penâhîlerinin şâyân buyurulması bâbında emr u fermân hazret-i veliyyü’l-emrindir. Fî 12 Rebî‘ülevvel sene 305, fî 15 Teşrîn-i sânî sene 303. Nâzır-ı Umûr-ı Mâliye Zühdü Kefâlet Nizâmnâmesi’nin sekizinci maddesi makāmına kāim olmak üzere ta‘dîlen kaleme alınıp mer‘iyyet-i ahkâmına bi’l-istîzân irâde-i seniyye-i hazret-i pâdişâhî şeref-müte‘allik buyurulmuş olan madde-i kānûniye sûretidir. Sekizinci madde: Bir me’mûrun kefîli vefât veyâhûd isti‘fâ eder ise bu kefilin târih-i vefâtı veyâ isti‘fâsından mu‘teber olmak üzere yine o me’mûrun iki ay müddet zarfında diğer kefîl göstermesi iktizâ edecek ve bu müddetde muhâsebesi behemehâl rü’yet olunacak ve te’hîr-i muhâsebeye sebeb olanlar mesûl olacaktır. Tecdîd-i kefâlet etmeyen me’mûra müsta‘fî nazarıyla bakılacakdır. Fî 10 Safer sene 305 ve fî [16] Teşrîn-i evvel sene 303.