İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 279 Hüküm no: 295 Orijinal metin no: [103-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doktor raporlarından yalnız mahkemelere ibraz edilecek olanlarının pul resmine tâbi olduğu Ma‘rûz-ı bende-i dîrîneleridir ki, Etibbâ raporlarından yalnız mehâkime ibrâz olunmak üzere tanzîm kılınanların pul resmine tâbi‘ olacağına dâir ittihâz olunan karârın teblîğine cevâben me’mûrînden tebdîl-i âb u hava ve tedâvice muhtâc ve tekā‘üde müstahak olduklarına dâir verilmekte olan raporlara pul vaz‘ı lâzım gelip gelmeyeceği hakkında Telgraf Nezâreti’nden vukū‘ bulan istifsâr ve ol bâbda cereyân eden muhâbere üzerine keyfiyet Şûrâ-yı Devlet’le lede’l-havâle Damga Kānûnu’nun ikinci maddesi hükmünce me’mûrînin isti‘fânâmeleriyle istihsâl-i me’zûniyeti hâvî istid‘âları müstesnâ olarak damga resminden mu‘âf tutulmuş olmasına ve me’mûrînden tebdîl-i âb u hava ve tedâvice veyâhûd tekā‘üde müstahak olduklarına dâir verilecek raporlar dahi ol bâbda i‘tâ edecekleri istid‘ânâmeleri teferru‘âtından ve binâen-aleyh karâr-ı mezkûrda resm-i damgaya tâbi‘ olmadığı gösterilen evrâk cümlesinden bulunmasına binâen ol vechile verilen raporlara esâsen pul vaz‘ı lâzım gelmeyeceği Şûrâ-yı mezkûr Tanzîmât Dâiresi’nden bâ-mazbata ifâde olunduğu beyânıyla îcâbının icrâsı bu kere Dâhiliye Nezâret-i celîlesinden vârid olan tezkirede iş‘âr olunmuş olduğundan ber-mûceb-i iş‘âr îfâ-yı mu‘âmele olunması husûsunun îcâb edenlere emr u irâde buyurulmasının huzûr-ı âlî-i cenâb-ı meşîhat-penâhîlerine arz ve izbârı Düyûn-ı Umûmiye İdâresi’nden ifâde kılınmış ve sûret-i hâl devâir-i sâire ve vilâyât-ı ma‘lûme ile elviye mutasarrıflarına dahi bildirilmiş olmağla ber-vech-i meşrûh îfâ-yı muktezâsı husûsuna himem-i aliyye-i âsafâneleri şâyân buyurulmak bâbında emr u fermân hazret-i veliyyü’l-emrindir. Fî selhi Zilhicce sene 304, 3 Kânûn-ı evvel sene 303. Nâzır-ı Umûr-ı Mâliye Zühdü