Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 558 Hüküm no: 680 Orijinal metin no: [119a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Reis b. Halil’in Hacı Osman b. Muharrem’e olan borcunu taksitle ödeyeceği Sefîne reislerinden olup mahmiye-i İstanbul’da Hocapaşa mahallesinde sâkin Ali Reis b. Halil meclis-i şer‘-i şerîf-i enverde mahmiye-i mezbûrede Alacahamam kurbunda Çelebioğlu mahallesinde sâkin işbu bâ‘isü’l-kitâb el-Hâc Osman b. Muharrem nâm kimesnenin li ebeveyn er karındaşı ve tarafından husûs-ı âti’l-beyâna vekîl olduğu nehc-i şer‘î ve tarîk-i mer‘î üzre sâbit olan Hasan Çelebi mahzarında ikrâr ve takrîr-i kelâm edip müvekkil-i mezbûr el-Hâc Osman Ağa’ya beynimizde nice ahz u i‘tâ ve mu‘âmelât-ı şettâdan ba‘de küllî hesâb üç yüz esedî guruş deynim olup lâkin meblağ-ı mezbûru def‘aten edâya iktidârım olmayıp te’cîl ve taksîte tâlib olduğumda, müvekkil-i mezbûr el-Hâc Osman dahi meblağ-ı mezbûrdan her otuz gün tamâmında kendiye beş esedî guruş verip târih-i kitâbdan bin sekiz yüz güne değin te’cîl ve taksît eylediğinde ben dahi taksît-i mezbûru kabûl ve meblağ-ı mezbûr üç yüz guruşu vech-i meşrûh üzre müvekkil-i mezbûr el-Hâc Osman Ağa’ya edâya ta‘ahhüd eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ahmed Çelebi b. Veli, Ahmed b. Mehmed, el-Hâc Ali b. Mustafa, Abdi b. Şaban, Hasan Çelebi b. Abdullah.