Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 559 Hüküm no: 681 Orijinal metin no: [119a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Naht v. Arslan’ın menzilini Osman b. Hasan’a satması Mahmiye-i İstanbul’da Kasım Ağa mahallesinde sâkin Naht v. Arslan nâm zimmî meclis-i şer‘-i şerîf-i enverde bâ‘isü hâze’l-kitâb Osman Efendi b. Hasan mahzarında bi tav‘ihî ikrâr-ı tâm ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ iki tarafdan Medîne-i Münevvere vakfı ve bir tarafdan Fâtıma Hâtun vakfı ve bir tarafdan tarîk-i âm ile mahdûd iki bâb fevkānî oda ve iki sofa ve dehliz ve bir kiler ve kenîfi ve tahtında iki bâb oda ve su kuyusu ve havluyu ve kenîfi müştemil mülk menzilimi cümle tevâbi‘ ve levâhıkı ve kâffe-i menâfi‘ ve merâfıkı ile mezbûr Osman Efendi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile üç yüz esedî guruşa bey‘ ve teslîm edip ol dahi ber vech-i muharrer iştirâ ve kabz ve tesellüm eylediğinden sonra semeni olan meblağ-ı mezbûr üç yüz esedî guruşu yedinden tamâmen ahz u kabz eyledim ba‘de’l-yevm menzil-i mahdûd-ı mezkûr merkūm Osman Efendi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Ramazâni’l-mübârek li sene seb‘a ve tis‘în ve elf. Şuhûdü’l-hâl: Mehmed Efendi b. Hasan, Hasan Bey b. Abdullah Bevvâb-ı sultânî, el-Hâc Mustafa b. Ali Sinobî, Ömer b. Ramazan tâbi‘-i el-Hâc Mustafa, İbrahim b. Ali Ankaravî, Mehmed b. Durmuş Ankaravî, Mehmed Sofu b. Mehmed, İbrahim Çelebi b. Ahmed ve gayruhüm mine’l-huzzâr.