İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 303 Hüküm no: 321 Orijinal metin no: [122-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nukud vakıflarından eshâma değiştirilmiş olanlarının tahvilat-ı cedide ile yapılacak mübadeleleri İstanbul Kādılığı’na, Fazîletlü Efendim Hazretleri, İstirbâhı meşrût olan nukūd-ı mevkūfeden vaktiyle eshâma tebdîl edilmiş olanların bu kere karâr-ı vâki‘ vechile tahvîlât-ı cedîde ile icrâ olunacak mübâdelesinde tahvîlât-ı cedîde nâma muharrer olmadığı cihetle eshâm-ı vakfiye mukābilinde mübâdeleten verilecek tahvîlât doğrudan doğruya mütevellîlere i‘tâ olunacak olur ise mütevellî dilediği vakitde onu satıp nakde tahvîl edebileceğine nazaran bu gibi mahzûr ber-taraf olmak ve mal-ı vakf taht-ı hüsn-i muhâfazada tutulmak üzere tahvîlât-ı cedîde mütevellîlere verilmeyip Mahkeme-i Teftîş-i Evkāf’dan ve Bâb-ı Fetvâ devâirinden birinde, sandığı bulunan vakfın tahvîlâtı mütevellîleri hazır oldukları hâlde sandıklarına vaz‘ ve muhâsebeleri rü’yet ettirilmesi ve hiçbir yerde sandığı olmayan vakfa gelince bunun şurût-ı vakfiyesi Hazîne-i Evkāfca güzelce tahkīk ve tedkīk olunduktan sonra bunun için Hazîne-i Evkāf Muhâsebesi’nin taht-ı teftîş ve nezâretinde ve Mahkeme-i Teftîş İdâresi altında hıfz olunmak üzere yeniden bir sandık ittihâzıyla âid olan tahvîlâtın bu sandığa vaz‘ı zımnında Hazîne-i Evkāf-ı Hümâyûn’a irsâl ve teslîmi ve taşralarda bulunan evkāfın [123] sehimlerine mukābil verilecek tahvîlât dahi evkāf muhâsebeci ve müdîrleri ve mahallî hâkimleri ve meclis-i idâre-i nezâretleri tahtında olarak ittihâz olunacak sandıklara mütevellîleri ma‘rifetleriyle vaz‘ ve sâir nukūd-ı mevkūfe gibi hıfz ettirilmesi hukūk-ı vakfın hüsn-i idâresini müstelzim olacağından mütevellîler taraflarından istid‘â vukū‘unda makām-ı nezâretle muhâbere edilmedikçe evkāfa müte‘allik eshâma mukābil i‘tâ olunacak tahvîlât-ı cedîdenin sened-i muvakkatleri hiçbir mütevellîye verilmemesi ve işitildiği üzere doğrudan doğruya mütevellîye sened-i muvakkat verilmiş ise kangı vakfın eshâmı mukābilinde ne mikdâr mebâliği hâvî ne kadar sened-i muvakkat kimlere i‘tâ edilmiş idiğini mübeyyin defterinin müsâra‘aten Hazîne-i Evkāf’a irsâl olunması ve taşralarca dahi nukūd-ı mevkūfe eshâmı mukābilinde tahvîlât-ı cedîde verilecek ise oralarca da mütevellîye verilmeyip evkāf muhâsebeci ve müdîrleri ve mahallî hâkimleri ile meclis-i idârenin nezâretleri tahtında mütevellîler ma‘rifetleriyle usûl-ı meşrû‘âsına tevfîkan hıfz ettirilmek üzere i‘tâ edilmesi zımnında bi’l-cümle me’mûrîn-i Mâliye’ye ta‘mîmen icrâ-yı teblîgāt olunması husûslarının Mâliye Nezâret-i celîlesine ve ber-vech-i muharrer Bâb-ı Fetvâ devâir-i şer‘iyesinden birinin taht-ı idâresinde sandığı bulunan vakfın eshâmına mukābil verilecek tahvîlât-ı cedîdenin ahz u hıfzına ve mütevellîleri ellerinde itlâf edilmemesine i‘tinâ edilmesinin devâir-i mezkûre rüesâsına teblîği ve taşralarda dahi sûret-i mesrûde vechile nezâret edilmesi emrinde hükkâm-ı şer‘a ta‘mîmen muharrerât-ı mahsûsa tastîri husûslarının taraf-ı mecîye iş‘ârı ve sûret-i meşrûha dâiresinde hareket olunması için evkāf muhâsebeciliklerine beyân-ı keyfiyet edilmesi Meclis-i İdâre-i Evkāf’dan ifâde ve ol vechile nezâret-i müşârün-ileyhâ ile evkāf muhâsebeciliklerine teblîğ-i madde kılınmış olduğundan bahisle icrâ-yı iktizâsına dâir Evkāf-ı Hümâyûn Nezâret-i celîlesinden vürûd eden tezkire Meclis-i Tedkīkāt-ı Şer‘iyye’ye lede’l-havâle karâr-ı vâki‘ hukūk-ı evkāfın muhâfazası maksad-ı meşrû‘una mübtenî olduğundan ber-mûceb-i iş‘âr rüesâ-yı devâir ile bi’l-umûm nüvvâb-ı şer‘a teblîgāt icrâsı ifâde olunarak Dersa‘âdet hükkâm-ı kirâmıyla merâkiz-i vilâyât ve elviye-i müstakille nüvvâbına iş‘âr-ı keyfiyet edilmiş ve işbu tezkirenin mülhakāta teblîği zımnında nüsah-ı kâfiyesi leffen tisyâr kılınmış olmağla îfâ-yı muktezâsına himmet buyurulması siyâkında tezkire-i senâverî terkīm olundu. Fî 28 Rebî‘üssânî sene 308, fî 29 Teşrîn-i sânî sene 306. Şeyhülislâm Ömer Lütfi