İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 312 Hüküm no: 331 Orijinal metin no: [127-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tıbbiye Mektebi’nin Askeriye mekteplerine dahil edilmesinden dolayı yazışmaların burayla yapılması Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Mekteb-i Fünûn-ı Tıbbiye-i Şâhâne bâ-irâde-i seniyye-i hazret-i pâdişâhî Mekâtib-i Askeriye-i Şâhâne Nezâret-i celîlesine ilhâk edilmiş olduğu hâlde bazı makāmât-ı âliyeden Mekteb-i Tıbbiye-i Şâhâne’ye âid umûr ve mesâlih hakkında doğrudan doğruya mekteb-i mezkûr nezâretine mürâca‘at olunmakta olup bu ise matlûb ve mülzem-i âlî olan intizâm ve inzibât-ı [128] idâreyi muhîll olacağı melhûz olduğundan ba‘demâ makāmât-ı mezkûreden yazılacak tezâkirin Mekâtib-i Askeriye-i Şâhâne Nezâret-i celîlesine gönderilmesi husûsunun îcâb edenlere teblîğ edilmesi Tophâne-i Âmire müşîri ve Umûm Mekâtib-i Askeriye-i Şâhâne nâzırı devletlü paşa hazretleri tarafından vâki‘ olan arz ve iş‘âr üzerine şeref-sâdır olan irâde-i seniyye-i hazret-i hilâfet-penâhî iktizâ-yı celîlinden bulunduğu Mâbeyn-i Hümâyûn Başkitâbet-i celîlesinden bâ-tezkire-i husûsiye iş‘âr kılınmış ve devâire teblîğ-i keyfiyet edilmiş olmağla taraf-ı vâlâ-yı hazret-i fetvâ-penâhîlerincede ona göre îfâ-yı mu‘âmeleye himem-i aliyye-i fetvâ-penâhîleri derkâr buyurulmak bâbında emr u irâde hazret-i men-lehu’l-emrindir. Fî 8 Muharrem sene 310 ve fî 20 Temmuz sene 308. Sadrıa‘zam ve Yâver-i Ekrem Cevad