İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 314 Hüküm no: 334 Orijinal metin no: [129-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mâbeyn-i Hümayun’da çalışan memurlarca dairelere yazılan tezkirelerin Mâbeyn-i Hümayun Başkitabeti’nden tasdik olunması İstanbul Kādılığı’na, Fazîletlü Efendim Hazretleri, Mâbeyn-i Hümâyûn-ı mülûkâneye me’mûr ve mensûb bi’l-cümle bendegân taraflarından her ne sûretle olur ise olsun iltimâs ve tavsiyeyi hâvî devâire tezkire yazılacak olur ise o misillü iltimâs ve tavsiyenâmelerin ol bâbda bir gûne icrâatda bulunulmaksızın atebe-i ulyâya li-ecli’t-takdîm tezkire-i mahsûsaya leffen başkitâbet makāmına gönderilmesi ve kezâlik bendegândan birinin devâirden birine da‘vâsı [ve]ya bir işi düşecek olursa o da‘vâ [ve]ya işin neden ibâret olduğunun tarafından evvel-emirde Başkitâbet’e bildirilerek icrâ kılınacak tahkīkāt üzerine başkitâbetden tasdîk olunması usûl ittihâz buyrulduğundan bendegâna âid de‘âvî ve umûrun başkitâbetin tasdîki olmadıkça rü’yet olunmaması mukaddemâ şeref-sâdır olup ta‘mîmen teblîğ kılınan irâde-i seniyye-i hazret-i hilâfet-penâhî ile mukarrer olduğu hâlde bazı yerlerde karâr-ı vâkı‘a ri‘âyet edilmemekde olduğu mesmû‘-ı âlî buyrulduğundan ba‘de-ezîn bu bâbda müttehaz olan usûlün muhâfazasına fevka’l-âde i‘tinâ ve dikkat olunması te’kîden şeref-sâdır olup Mâbeyn-i Hümâyûn Başkitâbet-i celîlesinden bâ-tezkire-i husûsiye teblîğ olunan irâde-i seniyye-i cenâb-ı mülûkâne iktizâ-yı celîlinden bulunmuş ve keyfiyet umûm devâir ile vilâyâta ve doğrudan doğruya idâre olunan mutasarrıflıklara teblîğ edilmiş olduğu beyânıyla Bâb-ı Fetvâ-penâhîce dahi ber-mantûk-ı emr u fermân-ı hümâyûn îfâ-yı muktezâsı bâ-tezkire-i sâmîye izbâr olunmuş ve devâir-i müte‘allikaya teblîgāt icrâ kılınmış olmağla dâire-i behiyelerince hükm-i celîl irâde-i seniyyeye tevfîk-i mu‘âmele ile lâzım gelenlere tenbîhât-ı mukteziye îfâsına himmet buyurulması siyâkında tezkire-i senâverî terkīm kılındı. Fî 29 Muharrem sene 310, fî 10 Ağustos sene 308. Şeyhülislâm Mehmed Cemaleddin