İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 316 Hüküm no: 336 Orijinal metin no: [130-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Padişaha sunulan arzuhaller üzerine sâdır olan iradelerin en geç bir hafta içinde infazı Taraf-ı Âlî-i Hazret-i Fetvâ-penâhî’ye, Ma‘rûz-ı bende-i dîrîneleridir ki, Rikâb-ı Hümâyûn-ı Hazret-i Hilâfet-penâhî’ye ref‘ edilerek manzûr-ı âlî olan arzuhâller üzerine şeref-sâdır olup Mâbeyn-i Hümâyûn Başkitâbet-i celîlesinden bâ-tezkire-i husûsiye teblîğ olunan ve bundan böyle teblîğ edilecek olan irâdât-ı seniyye-i şâhânenin ertesi hafta ashâbının tekrar istid‘âya mecbûr olmamaları için yevm-i teblîğinden i‘tibâren nihâyet bir hafta zarfında behemehâl infâz-ı hükm-i münîfiyle mevâdd-ı müsted‘â-bihânın devâir-i müte‘allikasınca sürüncemede bırakılmaması irâde-i seniyye-i cenâb-ı zıllullâhi muktezâ-yı âlîsinden bulunduğu kitâbet-i müşârün-ileyhâdan iş‘âr ve hükm-i celîli devâir-i sâireye de izbâr edilmiş olmağla taraf-ı âlî-i hazret-i meşîhat-penâhîlerince dahi ber-mantûk-ı fermân-ı hümâyûn îfâ-yı mu‘âmeleye kemâl-i i‘tinâ buyurulması bâbında emr u irâde hazret-i men-lehu’l-emrindir. Fî 7 Cumâdelûlâ sene 1310 ve fî 15 Teşrîn-i sânî sene 1308. Sadrıa‘zam ve Yâver-i Ekrem Cevad