İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 317 Hüküm no: 338 Orijinal metin no: [130-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emvâl-i eytâma kefalet edenlerin de borçlular gibi muameleye tâbi olmaları İstanbul Kādılığı’na, Fazîletlü Efendim Hazretleri, İ‘lâmât-ı Hukūkiye’nin sûret-i icrâsına dâir olan kānûnun otuz dokuzuncu maddesi zeylinde emvâl-i eytâma kefâlet edenlerin dahi medyûnîn-i eytâm misillü dâyin tarafından infâk olunmayarak habsedileceklerine mütedâir sarâhat olmamasına binâen ol bâbda sebk eden iş‘âr-ı senâverî üzerine Şûrâ-yı Devlet Tanzîmât Dâiresi’nden kaleme alınan mazbatada i‘lâmât-ı hukūkiyenin sûret-i icrâsına dâir olan sâlifü’z-zikr otuz dokuzuncu madde zeylinde mezkûr? nafakadan ve emvâl-i eytâmdan dolayı mahkûm bulunan medyûnlar [131] îfâ-yı deynden imtinâ‘ eyledikleri hâlde otuz ikinci ve otuz üçüncü maddelerin hükmünden müstesnâ tutularak her hâlde habsolunur ve otuz altıncı madde hükmünce dâyinleri tarafından infâz olunmaz deyü muharrer olup kefiller dahi medyûnlar makāmına kāim olduklarından işbu kefîllerin dahi dâyinler cânibinden infâkı lâzım gelmeyeceği gösterilmiş ve Adliye Nezâret-i celîlesine de ma‘lûmât verilmiş idiği bâ-tezkire-i sâmîye-i vekâlet-penâhî iş‘âr ve keyfiyet Dersa‘âdet hükkâm-ı şer‘iyesiyle merâkiz-i vilâyât ve elviye-i müstakille nüvvâbına izbâr kılınmış ve işbu tezkirenin nüsah-ı kâfiyesi îcâb edenlere teblîğ olunmak üzere leffen tisyâr edilmiş olduğu beyânıyla tezkire-i hulûsverî terkīm olundu. Fî 28 Şevval sene 1310 ve fî 3 Mayıs sene 1309. Şeyhülislâm Mehmed Cemaleddin