Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 560 Hüküm no: 683 Orijinal metin no: [119b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avadik v. Asvador’un borçlarını taksitle ödemesi Mahmiye-i İstanbul’da Sancakdar mahallesinde sâkin Avadik v. Asvador nâm zimmî meclis-i şer‘-i şerîfde ashâbü hâze’l-kitâb el-Hâc Ömer b. el-Hâc Mehmed ve el-Hâc Abdullah b. Ali ve el-Hâc Mehmed b. Mustafa nâm kimesneler mahzarında ikrâr-ı tâm ve takrîr-i kelâm edip cihet-i deyn-i şer‘îden mezbûr el-Hâc Ömer’e elli üç buçuk guruş ve mezbûr el-Hâc Abdullah’ın iki yüz doksan guruş ve mezbûr el-Hâc Mehmed’e yüz yirmi sekiz buçuk guruş deynim olup mezbûrûndan birbirine deynim olan meblağları def‘aten edâya iktidârım olmayıp taksîte tâlib olduğumda, mezbûrûn el-Hâc Abdullah ve el-Hâc Ömer ve el-Hâc Mehmed’den her birine târih-i kitâb senesi Şevvâlü’l-mükerremi gurresinde beş guruş verip ve gurre-i mezbûreden her bir ayda birer guruş vermek üzre mezbûr el-Hâc [Ömer] kırk sekiz buçuk ay tamâmına ve mezbûr el-Hâc Abdullah iki yüz seksen beş ay tamâmına ve mezbûr el-Hâc Mehmed yüz yirmi üç buçuk ay tamâmına değin edâ etmek üzre mezbûrûn el-Hâc Ömer ve el-Hâc Abdullah ve el-Hâc Mehmed’den her biri beni taksît eylediklerinde ben dahi zikr olunan taksîti kabûl eyledim dedikde gıbbe’t-tesâduki’l-mu‘teber mâ vaka‘a bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mehmed Beşe b. Abdullah, Ali Beşe b. Mehmed, İbrahim Çelebi b. Mehmed, Mehmed b. Abdullah, Ahmed b. Abdullah.