İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 344 Hüküm no: 375 Orijinal metin no: [146-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamidiye Hicaz Demiryolu yapımına katkıda bulunanlara verilen madalyaları kaybedenlere yenisinin verilmesi Bâb-ı Âlî Dâire-i Sadâret-i Uzmâ Mektûbî Kalemi Aded: 207 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Hamidiye Hicaz Demiryolu’nun mesârif-i inşâiyesi için iânâtda bulunanlara ve mezkûr demiryoluna âid husûsâtın icrâsınca hüsn-i hizmetleri sebk edenlere verilmekte bulunan madalyaları hâmil zevâtdan bu madalyaları zâyi‘ edenler olur ise Dersa‘âdet’de me’mûrînden olanların mensûb bulundukları devâire ve me’mûrînden olmayanların Şehremâneti’ne ve taşrada vilâyâta vâki‘ olacak mürâca‘atları üzerine oralarca mezkûr demiryolu İdâre-i Mâliyesi Nezâret-i celîlesinden iş‘âr-ı keyfiyet olunduktan ve nezâret-i müşârün-ileyhâca tedkīkāt-ı kaydiye icrâ kılındıktan sonra kendilerine zâyi‘den diğerlerinin verilmesi ve yeniden i‘tâ olunacak bu madalyaların altın nev‘i için bir Osmanlı lirası ve gümüşleri için bir Mecîdî ve nikellerinden de on beş guruş alınarak bu mebâliğin mezkûr demiryolu mesârif-i inşâsiyesine âid olmak üzere nezâret-i müşârün-ileyhâca îrâd kaydedilmesi husûslarının usûl ittihâzı Komisyon-ı Âlî’nin karâr ve arzı üzerine şeref-sudûr buyrulan irâde-i seniyye-i hazret-i pâdişâhî iktizâ-yı âlîsinden bulunduğu Mâbeyn-i Hümâyûn Başkitâbet-i celîlesinden bâ-tezkire-i husûsiye inbâ ve devâir-i merkeziyeye teblîgāt icrâ kılınmış olmağla Bâb-ı Vâlâ-yı Meşîhat-penâhîlerince dahi ber-mantûk-ı emr u fermân-ı hümâyûn-ı şâhâne îcâbının îfâsı bâbında emr u irâde hazret-i men-lehu’l-emrindir. Fî 16 Zilka‘de sene 321, fî 21 Kânûn-ı sânî sene 319. Sadrıa‘zam Ferid