İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 349 Hüküm no: 381 Orijinal metin no: [148-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmî dairelere verilen evraka mukabil sahipleri tarafından istenen numara pusulalarının adi evraka yazılmayıp Hicaz Demiryolu İdaresince bastırılıp satılan kâğıtlarla yazılması Bâb-ı Âlî Dâire-i Sadâret-i Uzmâ Mektûbî Kalemi Aded: 156 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Efrâd-ı asâkir-i şâhâneye âid evrâk müstesnâ olmak üzere ba‘de-ezîn devâir-i resmiyeye tevdî‘ olunan evrâka mukābil ashâbı tarafından taleb olunacak numara pusulaları âdî evrâka yazılmayıp Hicaz Demiryolu İdâre-i Mâliyesi Nezâretince sûret-i mahsûsada tab‘ ve yirmişer para fiâtla füruht olunacak evrâk üzerine tahrîr olunması ve devâir-i resmiye veznelerince bu pusulalardan lüzûmu mikdârı mübâya‘a ve tedârik ve idâresi evrâk kalemine kayd ile i‘tâ olunup numara pusulası isteyenlere verilmesi ve esmânının Hamidiye Hicaz Demiryolu mesârif-i inşâiyesine karşılık tutulması ve bu evrâk bedelâtının mâ-vuzı‘a lehûnun gayrisinde isti‘mâl edenlerin o bâbdaki nizâmnâme-i mahsûs ahkâmına göre dûçâr-ı mücâzât olacaklarının ta‘mîmen devâir-i vilâyât-ı şâhâneye teblîği zikrolunan Demiryolu Komisyon-ı Âlîsi’nin mazbata-i ma‘rûzası üzerine şeref-sâdır olan irâde-i seniyye-i cenâb-ı pâdişâhî iktizâ-yı âlîsinden bulunduğu Mâbeyn-i Hümâyûn Başkitâbet-i celîlesinden bâ-tezkire-i husûsiye inbâ ve ta‘mîmen teblîgāt icrâ kılınmış olmağla Bâb-ı Vâlâ-yı Meşîhat-penâhîlerince de ber-mantûk-ı emr u fermân-ı hümâyûn-ı şâhâne iktizâsının îfâsına himem-i aliyye-i şeyhülislâmîleri masrûf buyurulmak bâbında emr u irâde hazret-i men-lehu’l-emrindir. Fî 10 Zilka‘de sene 322 ve fî 3 Kânûn-ı sânî sene 320. Sadrıa‘zam Ferid