İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 352 Hüküm no: 385 Orijinal metin no: [150-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damga Resmî Kanunu’nun, pulu iptal edilmeden verilen evrak ve bunlarla ilgili yapılacak işlerlere ait maddelerinin izahı Nezâret-i Umûr-ı Mâliye Meclis-i Mâliye Aded: 262 Ma‘rûz-ı bende-i dîrîneleridir ki, Resm-i Damga Kānûn-ı Cedîdi’nin kırk sekizinci maddesinin fıkra-i evvelîsi ta‘rifât-ı kānûniye dâiresinde pulu ibtâl edilmemiş olan evrâkın kabûl edilmeyeceğini ve fıkra-i ahîresi kabûl eden me’mûrun resmî mühür ile ibtâl edeceğini mutazammın olmasına nazaran fıkra-i ahîrenin hükmü kabûl me’mûrun cezâ-yı nakdî i‘tâsından sonra mı veyâ evvel mi icrâ edeceğinde tereddüd olduğundan bahis ile îcâbı bazı tarafdan istifsâr olunmasıyla bi’l-istîzân şeref-vârid olan 9 Eylül sene 322 târihli buyruldu-yı sâmî-i cenâb-ı sadâret-penâhî ile teblîğ buyrulan Şûrâ-yı Devlet Tanzîmât Dâiresi mazbatası sûretinde madde-i mezkûrenin birinci fıkrası resm-i maktû‘ ta‘rifesinin elli üç ve elli dört ve elli beş numaralarında muharrer evrâkdan pulsuz veyâ noksan pulu hâvî olanlarla yirmi dokuzuncu madde hükmüne gayr-ı muvâfık sûretde pul vaz‘ edenler hakkında icrâ olunacak mu‘âmeleye müte‘allik ve mutâbık olup ikinci fıkrası ise tâbi‘ olduğu pul tamamen ilsâk olunmuş ve fakat ta‘rifât-ı kānûniye dâiresinde ibtâl edilmemiş olan evrâka âid ve munhasır ve fıkra-i ûlâ hâricinde kalan mu‘âmeleye dâir olup fıkra-i sâniyede maksûd olan evrâk dahi kezâlik birinci fıkrada gösterilen ve sırf arzuhâl şekil ve mâhiyetinde bulunan evrâkdan ibâret ise de fıkra-i mezkûrenin tanzîminden maksad mümzâ hükm-i nizâma adem-i vukūfdan veyâ pul bulunamamasından nâşî pulsuz veyâ ibtâl edilmemiş pulu hâvî olarak mesâfe-i ba‘îdeden veyâ memâlîk-i ecnebiyeden gönderilen ve ekseriyâ mu‘akkabı bulunup pul ilsâkı taleb edilen temyîz ve hacz istid‘ânâmeleriyle sâir istid‘ânâmelerin adem-i kabûl ile mürûr-ı zamana uğradılması yüzünden telâfîsi gayr-ı kābil bir zarara dûçâr olmamaları için bunlar bir mu‘âmele-i istisnâiyeye muhtâc görünmüş ve binâen-aleyh resm-i damga tamamen ilkā edilip de ortada Hazîne-i Celîle’ye âid bir zarar-ı maddî ve ma‘nevî kalmamış ve yalnız ibtâl-i keyfiyeti nâkıs kalmış olan bu misillü evrâka âid pulların me’mûrîn tarafından mühr-i resmî ile ibtâline ya‘ni noksan kalan mu‘âmelenin ikmâline cevâz-ı nizâmî gösterilip şu hâlde ikinci fıkra birinci fıkranın mütemmimi ve istisnâsı olduğundan maksad ve hükm-i meşrûha göre mu‘âmele îfâsı husûsu beyân olunmuş ve bi’l-cümle me’mûrîn-i Mâliyeye ve sâir îcâb edenlere teblîğ-i keyfiyet edilmiş olduğunun Meclis-i Mâliye ifâdesiyle arz ve izbârına ibtidâr kılındı, ol bâbda emr u fermân hazret-i veliyyü’l-emrindir. Fî 7 Ramazan sene 324 ve fî 11 Teşrîn-i evvel sene 322. Mâliye Nâzırı Mehmed Ziya