İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 354 Hüküm no: 387 Orijinal metin no: [150-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tadil edilen Damga Kanunnamesi nüshalarının ulaşmadığı yerlerde eski kanuna göre muameleye devam edildiği Nezâret-i Umûr-ı Mâliye Meclis-i Mâliye Aded: 328 Ma‘rûz-ı bende-i dîrîneleridir ki, Ahîren ta‘dîl olunan Damga Kānûnnâmesi nüshalarından mürekkeben postahâneye tevdî‘ edilmiş olan denklerin bazı mahallere henüz îsâl olunamamasından dolayı o misillü mahallerde bi’t-tab‘ eski kānûn mûcebince mu‘âmele icrâsına mecbûriyet hâsıl olarak metn-i kānûnda musarrah olan mebde’ târihinden kānûn-ı mu‘addel-i mezkûrun mahallerine vüsûlüne değin geçen müddet zarfında eski kānûna tevfîkan tanzîm edilmiş olan evrâk ve senedât hakkında edilecek mu‘âmele bazı tarafdan istifsâr olunmasıyla bu bâbda sebk eden arz ve iş‘âr-ı âcizîye cevâben şeref-vârid olan buyruldu-yı sâmîde kānûn-ı mu‘addel-i mezkûrun teahhur-ı îsâli dolayısıyla müddet-i mu‘ayyenesi zarfında hükmünü tatbîk edemeyen mahallerce kānûn-ı mezkûrun vusûlüne kadar tanzîm ve te‘âtî edilen evrâk ve senedât kānûn-ı mu‘addel hükmünce pul noksan yapıştırılmış ise bu noksanın ikmâliyle iktifâ olunarak bir gûnâ cezâ-yı nakdî aranılmaması husûsuna lede’l-arz irâde-i seniyye-i hazret-i hilâfet-penâhî şeref-müte‘allik buyurulmuş olduğu emr ve beyân olunmuş ve bi’l-cümle me’mûrîn-i Mâliye ve sâir îcâb edenlere teblîğ-i keyfiyet edilmiş olduğunun Meclis-i Mâliye [151] ifâdesiyle beyân ve izbârına ibtidâr kılındı, ol bâbda emr u fermân hazret-i veliyyü’l-emrindir. Fî 24 Zilka‘de sene 324 ve fî 26 Kânûn-ı evvel sene 322. Mâliye Nâzırı Mehmed Ziya