İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 355 Hüküm no: 388 Orijinal metin no: [151-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köprülerden arabalı veya arabasız geçişler ile vapurlara binenlerden ücret alınması Bâb-ı Âlî Dâire-i Sadâret-i Uzmâ Mektûbî Kalemi Aded: 275 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Cisreyn vâridâtı Tersâne-i Âmire’nin ve Adalar ile Kadıköyü ve Haydarpaşa gibi sevâhil-i mütecâvireye işleyen vapurların hâsılâtı dahi idâre-i mahsûsanın en mühim mesârifinin karşılığı olup erkân ve ümerâ ve zubbât ve efrâd-ı askeriyeden mâ‘adâ herkesden bilâ-istisnâ köprü ücreti alınması mukaddemâ şeref-sâdır olan irâde-i seniyye-i hazret-i hilâfet-penâhî iktizâ-yı âlîsinden ve erkân ve ümerâ ve zubbât-ı askeriyenin araba ile köprülerden mürûrlarında ve me’mûrîn ve ketebenin gerek arabaya râkiben gerek mâşiyen geçtiklerinde köprü ücreti te’diye etmeleri lâzımeden bulunduğu hâlde buna ri‘âyet olunmaması ve hiçbir istisnâya tâbi‘ olmayan sevâhil-i mütecâvire vapurlarında dahi bazı zevâtın bilet almaktan imtinâ‘ eylemeleri her iki cihet vâridâtına pek mühim nakīsa îrâs eylediği gibi zâyi‘ât-ı vâkı‘a ber-taraf edilmedikçe yeni köprünün ikmâl-i inşââtıyla yerine vaz‘ına kadar mevcûd köprünün ta‘mîrât ve izâle-i mazarrâtı ve mezkûr vapurlarda ıslâhat icrâsı için karşılık tedâriki gayr-ı kābil olduğundan bahisle ta‘mîrât ve ıslâhat-ı mezkûrenin mevki‘-i fi‘ile îsâli te’mîn ve teshîl ve bu husûsda Dâire-i Bahriye’ye bir mu‘âvenet-i mahsûsa ibrâz kılınmış olmak üzere ümerâ ve zâbitânın ber-vech-i muharrer araba ile mürûrlarında ve me’mûrîn ve ketebe ve sâirenin dahi gerek arabaya râkiben gerek mâşiyen geçtiklerinde köprü ücretini te’diye etmeleri ve sevâhil-i mütecâvire vapurlarıyla gelip gidenlerin de her hâlde bilâ-istisnâ bilet almaları zımnında îcâb edenlere tenbîhât-ı ekîde icrâsı Bahriye Nezâret-i celîlesinin iş‘ârı üzerine ta‘mîmen devâire teblîğ kılınmış olmağla Bâb-ı Vâlâ-yı Meşîhat-penâhîlerince de ona göre iktizâsının îfâsı bâbında emr u irâde hazret-i men-lehu’l-emrindir. Fî 17 Zilhicce sene 324 ve fî 18 Kânûn-ı sânî sene 322 Sadrıa‘zam Ferid