İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 356 Hüküm no: 389 Orijinal metin no: [151-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmî dairelere devredilen vakıf mahallerin işlemlerinde harc alınmaması Bâb-ı Âlî Dâire-i Sadâret-i Uzmâ Mektûbî Kalemi Aded: 4 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Mukāta‘aya rabtedilecek vakıf mahaller için mukāta‘anın bir seneliğinin ilmühaber harcı olarak ahzı nizâmı iktizâsından bulunduğu hâlde devâir-i resmiye nâmına teferruğ olunan vakıf mahallerin ilmühaber harcı istifâ ve Cihât İdâresince de kaydları bi’t-tesviye ilmühaberleri i‘tâ edilememekde olduğuna ve bu teahhur o misillü yerlerin mukāta‘aya rabtından dolayı vakıflarının mahlûl mu‘accelâtıyla eyyâm-ı hâliye ferâğ ve intikāl hâsılâtından gördükleri zâyi‘âta mukābil tahsîs edilmiş olan mukāta‘at-ı seneviyenin tahsîlini işkâl eylemekde bulunduğu anlaşıldığına binâen devâir-i resmiyenin gayriye ferâğ olunan mahallere şümûlü olmamak üzere devâir-i resmiye nâmına teferruğ edilen vakıf mahaller için Evkāf-ı Hümâyûn Nezâret-i celîlesinin iş‘ârı mûcebince bilâ-harc ilmühaber i‘tâsı münâsib görülmüş olup ancak Hazîne-i Celîle’nin hukūkunu muhâfazaten mukāta‘at bedelâtının her sene tesviyesi lâzım geleceğinden o vechile icrâ-yı îcâbı Şûrâ-yı Devlet karârıyla ta‘mîmen devâir-i merkeziyeye teblîğ ve inbâ ve nezâret-i müşârün-ileyhâya ma‘lûmât i‘tâ olunmağla Bâb-ı Vâlâ-yı Hazret-i Meşîhat-penâhîlerince de ber-vech-i karâr îfâ-yı muktezâsı bâbında emr u irâde hazret-i men-lehu’l-emrindir. Fî 10 Safer sene 325, fî 11 Mart sene 323. Sadrıa‘zam Ferid