İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 356 Hüküm no: 390 Orijinal metin no: [151-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damga Resmî Kanunu’nun uygulamasında daire ve mahkemeler ile Düyun-ı Umumiye İdaresi arasında ortaya çıkan ihtilafların Damga Resmî Tedkik Komisyonunca çözülmesi Bâb-ı Âlî Dâire-i Sadâret-i Uzmâ Mektûbî Kalemi Aded: 104 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Damga Resmî Kānûn-ı Cedîdi’nin sûret-i tatbikiyesince devâir ve mehâkim ile Düyûn-ı Umûmiye İdâresi beyninde bazı ihtilâfât hâsıl olduğu anlaşılması üzerine bi’l-istîzân şeref-sâdır olan irâde-i seniyye-i cenâb-ı hilâfet-penâhî mantûk-ı âlîsine tevfîkan kānûn-ı [152] mezkûra müte‘allik mu‘âmelât-ı tefsîriye ve tatbîkiye ile iştigāl eylemek üzere Bâb-ı Âlî Hukūk Müşâviri atûfetlü Hakkı Beyefendi hazretlerinin riyâseti altında teşkîl olunan Damga Resmî Tedkīk Komisyonu’ndan i‘tâ kılınan mazbatada Damga Resmî Kānûn-ı Cedîdi’nin devâir ile Düyûn-ı Umûmiye İdâresince muhtâc-ı tefsîr ve îzâh görülen mevâddının ba‘de-ezîn lâ-büdü’l-müzâkere komisyona iş‘ârı ve kānûn-ı mezbûrun te’mîn ve teshîl-i tatbîkātına medâr olmak üzere devâirce efrâd ile olan mu‘âmelâta müte‘allik ne gibi evrâk tanzîm yâhûd ahz ve kabûl olunmakta ise bunların mâhiyâtını gösterecek îzâhâtı hâvî birer cedvel ile evrâk-ı mezkûrenin matbû‘ olanlarından üçer nüshasının komisyona tisyârı lüzûmu inbâ ve ta‘mîmen teblîgāt icrâ edilmiş olmağla Bâb-ı Vâlâ-yı Meşîhat-penâhîlerince de ber-minvâl-i muharrer iktizâsının îfâsı bâbında emr u irâde hazret-i men-lehu’l-emrindir. Fî 15 Şa‘bân sene 325 ve fî 10 Eylül sene 323. Sadrıa‘zam Ferid