İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 368 Hüküm no: 402 Orijinal metin no: [158-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merkez daireler ile Düyun-ı Umumiye İdaresi arasındaki muhaberatın komiserlik vâsıtasıyla yapılması Nezâret-i Umûr-ı Mâliye Mektûbî Kalemi Aded: 473 Ma‘rûz-ı bende-i dîrîneleridir, Devâir-i merkeziye ile Düyûn-ı Umûmiye İdâresi arasındaki bi’l-cümle muhâberâtın komiserlik vâsıtasıyla icrâsı usûl-ı mer‘iyye ve teblîgāt-ı vâkı‘a iktizâsından olup ancak bazı devâir rüesâ ve erkânı Meclis-i İdâre reisini veyâhûd müdîr-i umûmiyi nezdine celb yâhûd bunlar doğrudan doğruya devâire azîmet ederek bir mesele hakkında müzâkerât-ı şifâhiye icrâsıyla bir karâr ittihâz edilmekde olduğu ve Meclis-i İdâre’nin ictimâ‘ında reis tarafından mezkûr karâr meclise teblîğ edildiği sırada meseleden kat‘iyyen haber ve ma‘lûmâtı olmayan komiser meclisde ihtiyâr-ı sükûnet etmekten başka bir şey yapamamakta bulunduğu ve binâen-aleyh mu‘âmele-i vâkı‘a muhâlif-i ahvâl ve nizâm olduğu cihetle ba‘demâ bu gibi mesâilin de komiserlik vâsıtasıyla teblîği veyâhûd cereyân edecek müzâkerâtda komiserin de hazır bulundurulması lüzûmu Düyûn-ı Umûmiye Komiserliği’nden alınan tezkirede iş‘âr kılınmış ve keyfiyet devâir-i merkeziyeye teblîğ edilmiş olduğundan dâire-i celîle-i meşîhatce de ol vech ile îfâ-yı mu‘âmeleye himem-i celîle-i meşîhat-penâhîlerinin şâyân buyurulması bâbında emr u fermân hazret-i veliyyü’l-emrindir. Fî 2 Safer sene 327 ve fî 10 Şubat sene 324. Mâliye Nâzırı Rıfat