İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 371 Hüküm no: 404 Orijinal metin no: [159-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamidiye Hicaz Demiryolu’na mahsus iane ilmühaberini yapıştırmayan ve adi kâğıt kullananlardan alınan ceza-yı nakdilerin listesinin düzenlenmesi Hamidiye Hicaz Demiryolu Komisyon-ı Âlîsi Aded: 32 Taraf-ı Âlî-i Meşîhat-penâhî’ye, Ma‘rûz-ı bende-i dîrîneleridir, Arzuhâl ve lâyihalara merbût olan veyâhûd rabt olunmuş hükmünde bulunan evrâka Hamidiye Hicaz Demiryolu’na mahsûs iâne ilmühaberini yapıştırmamış ve maâş ve mesârif-i makbûz senedâtı ile hatt-ı âlî menfa‘atine muhdes sâir kıymetli evrâkın yerine evrâk-ı âdiye isti‘mâl etmiş ve bi’l-kabûl mevki‘-i mu‘âmeleye koyulmuş olanlardan istihsâli bâ-irâde-i seniyye-i mülûkâne müttehaz mukarrerât îcâbından bulunan cezâ-yı nakdîlerin [160] mikdârına ve nereye gönderildiğine dâir Komisyon-ı Âlîce istihsâl-i ma‘lûmât edilmesi lâzım gelmiş olduğundan şimdiye kadar bu misillü şeylerden dolayı ne mikdâr cezâ-yı nakdî istihsâl ve hangi târihlerde nerelere irsâl kılınmış olduğunu mübeyyin birer cedvelinin bi’t-tanzîm isbâliyle beraber mevcûd-ı hâzıranın ve ba‘demâ hâsıl olacak mikdârının da cedveliyle leffen Hatt-ı Âlî İdâre-i Mâliyesi Nezâret-i celîlesine gönderilmesi îcâb edenlere teblîğ olunmağla taraf-ı âlî-i meşîhat-penâhîlerinden dahi ona göre icrâ-yı îcâbı bâbında emr u irâde hazret-i men-lehu’l-emrindir. Fî 14 Safer sene 325 ve fî 16 Mart sene 323. Hamidiye Hicaz Demiryolu Komisyon-ı Âlîsi A‘zâsından Sadrıa‘zam Ferid