İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 371 Hüküm no: 405 Orijinal metin no: [160-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evrak-ı askeriye müteahhitlerine verilen çek ve senetlere yapıştırılacak pulun nev‘i Nezâret-i Umûr-ı Mâliye Encümen-i Umûr-ı Mâliye Aded: 299 Ma‘rûz-ı bende-i dîrîneleridir, Düyûn-ı Umûmiye Meclis-i İdâresi Riyâseti’nden bi’l-vürûd Damga Resmî Tedkīk Komisyonu’ndan havâle buyrulan fî 27 Kânûn-ı evvel sene 323 târihli müzekkireye merbût defterin evrâk-ı askeriye müte‘ahhidlerinin matlûbâtını mutazammın yazılan sûretler muhteviyâtının tesviyesi esnâsında usûlen yazılan çeklere yâhûd alınacak âdî senedlere ne nev‘ pul ilsâkı îcâb edeceğinin tedkīk ve ta‘yînine dâir olan seksen beş numaralı fıkrası mezkûr komisyonda lede’l-mütâla‘a devâir-i resmiyece bi’l-cümle ashâb-ı matlûb yedine i‘tâ kılınmakta olan sûret ve sergiler nakid makāmında tutularak bunların efrâd tarafından hîn-i ahzında tanzîm kılınan senedâta nisbî pul ilsâk edildiği cihetle mezkûr sûret ve sergiler muhteviyâtının nakden tesviyesi zamanında tanzîm edilen makbûzlara maktû‘ pul ilsâkı ile iktifâ edilmesi tabî‘i bulunduğundan o vech ile îfâ-yı mu‘âmele olunması mezkûr komisyondan bâ-mazbata ifâde olunduğu beyân-ı âlîsiyle mûcebince îcâbının icrâsı bu kere şeref-vârid olan fî-Haziran sene 324 târihli ve bin yüz altı numaralı tezkire-i sâmîyede iş‘âr buyurulmuş ve Encümen-i Umûr-ı Mâliye ifâdesiyle bi’l-umûm me’mûrîn-i Mâliye’ye ve sâir lâzım gelenlere keyfiyet teblîğ edilmiş olmağla arz-ı ma‘lûmâta ibtidâr kılındı, ol bâbda emr u fermân hazret-i veliyyü’l-emrindir. Fî 10 Şevval sene 326 ve fî 23 Teşrîn-i evvel sene 324. Mâliye Nâzırı Nâmına Müsteşâr ed-Dâ‘î Mahmud Esad