İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 372 Hüküm no: 406 Orijinal metin no: [160-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sicill-i ahval kayıtlarının düzgün olarak tutulması için her ay sonunda cetvellerin hazırlanarak gönderilmesi Bâb-ı Fetvâ Sicill-i Ahvâl İdâresi Aded: 296 Taraf-ı Âlî-i Cenâb-ı Meşîhat-penâhî’ye, Sicill-i Ahvâl kalemleri ta‘lîmât-ı mahsûsası mûcebince munhasıran me’mûrînin siyer ve ahvâlini ve vekāyi‘-i mütenevvi‘a-i resmiyeleriyle bütün evsâfını zabt ve tescîl ile mükellef oldukları hâlde Bâb-ı Fetvâ-penâhîleri Sicill-i Ahvâl İdâresince me’mûrîn-i ilmiye ve şer‘iyesinin silsile-i vekāyi‘-i resmiyelerinin ta‘kīb ve tezyîli şimdiye kadar dâhil-i dâire-i imkân olamamışdı. Me’mûrînin intihâbât ve terakkiyâtında büyük bir kısmını hâiz olması lâzım gelen emr-i tescîlin her tarafca kesb etmekte olduğu ehemmiyet teemmül edilerek ricâl ve me’mûrîn ve mensûbîn-i ilmiyenin ahvâl-i hâzıralarının kayd ve tesbîtine hasr-ı mesâ‘î kılınmış binâen-aleyh ba‘demâ sicill-i ahvâl-i me’mûrîn mu‘âmelât-ı mühimmesinin bir intizâm-ı dâimî tahtında cereyân etmesi için her şehr gāyetinde o ay zarfında vukū‘a gelen infisâl ve ta‘yîn ve terfî‘ ve tahvîl misillü vukū‘ât-ı mütevâliye-i resmiyenin bilinmesi muktezâ-yı hâl ve maslahdan bulunmuş olduğundan tasvîb-i âlî-i meşîhat-penâhîlerine mukārin olduğu takdîrde her ay nihâyetinde cedâvil-i mahsûsa ile idâre-i âcizîye ma‘lûmât verilmesi lüzûmunun dâire-i celîle-i meşîhat-penâhîleri dâhil ve hâricdeki mecâlis ve aklâm ve şu‘ubât rüesâsına ta‘mîmen emr ve teblîğ buyurulması bâbında emr u fermân hazret-i veliyyü’l-emrindir. Fî 9 Muharremi’l-harâm sene 1327 ve fî 19 Kânûn-ı sânî sene 1324. Mûcebince, fî 12 Muharrem sene 327.