İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 373 Hüküm no: 407 Orijinal metin no: [161-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vilayetlerden merkez dairelere gönderilen yazışmaların dikkate alınması Hüve Bâb-ı Âlî Dâire-i Sadâret-i Uzmâ Mektûbî Kalemi Aded: 69 Taraf-ı Âlî-i Cenâb-ı Meşîhat-penâhî’ye, Ma‘rûz-ı bende-i dîrîneleridir ki, Vilâyâtdan devâir-i merkeziyeye vukū‘ bulmakta olan iş‘ârâtın nazar-ı dikkate alınmamakta olmasından dolayı mu‘âmelât-ı umûmiyenin hüsn-i tedvîri kābil olamadığı ve zuhûr edecek netâyîc-i gayr-ı marzıyenin mesûliyeti kabûl olunamayacağı vilâyetlerden vârid olan telgraflarda beyân olunması üzerine vilâyâtdan kavânîn-i mer‘iyye ahkâmına ve muktezâ-yı mevki‘ ve maslahata muvâfık sûretde vukū‘ bulacak iş‘ârât ve mütâla‘âtın devâir-i merkeziyece nazar-ı dikkate ahzı ile îcâbâtının tesrî‘i mukarrer olduğu ve fakat bazı vilâyetlerin devâir-i âidesinden makām-ı sadârete tevdî‘ olunan muhâberâtda kavânîn ve nizâmât-ı câriye ve mukteziyât-ı maslahat ve salâhiyet ile kābil-i tevfîk olmayacak mutâlebât ve mütâla‘âta tesâdüf edilmekde olduğundan ve muhâlif-i usûl ve kavânîn iş‘ârâtın is‘âfı kābil olamayacağından bahisle vilâyetlerce de kavânîn-i mer‘iyye ve salâhiyet-i mu‘ayyene hâricinde iş‘ârâtdan tevakkī edilmesi lüzûmu bi’l-umûm vilâyât ile elviye-i gayr-ı mülhakaya teblîğ edilmiş ve devâir-i sâireye de ma‘lûmât verilmiştir. Vilâyetlerden şimdiye kadar vâki‘ olup da henüz îcâbâtı îfâ edilmeyen iş‘ârât var ise tesrî‘ine ve ba‘demâ vukū‘ bulacak mürâca‘atın da teahhura uğradılmamasının iktizâ edenlere ekîden ihtârına himem-i aliyye-i meşîhat-penâhîleri derkâr buyurulmak bâbında emr u irâde hazret-i men-lehu’l-emrindir. Fî 14 Cemâziyelûlâ sene 327 ve fî 21 Mayıs sene 325. Sadrıa‘zam Hüseyin Hilmi