İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 375 Hüküm no: 409 Orijinal metin no: [162-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merkez dairelere verilen veya taşradan gelen arzuhallerin muamele neticesinin arzuhal sahiplerine bildirilmesi Bâb-ı Âlî Dâire-i Sadâret-i Uzmâ Mektûbî Kalemi Aded: 75 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Devâir-i merkeziyeye verilen yâhûd taşradan vürûd eden arzuhâllerden mu‘âmeleden müstağnî ad olunanlar devâir-i mezkûrece hıfz edilmekde ve bundan haberdâr olmayan ashâb-ı müsted‘iyâtın icrâ edilecek mu‘âmelenin netîcesine intizâr etmekte bulundukları mürâca‘at-ı vâkı‘adan anlaşılmakta olduğundan ba‘de-ezîn müstağnî-yi mu‘âmele olan ve hıfzı lâzım gelen arzuhâllerin sahibleri Dersa‘âdet’de ise kendilerine taşrada oldukları takdîrce mensûb oldukları vilâyetlere sûret-i mu‘âmeleden ma‘lûmât i‘tâsı bi’t-tensîb keyfiyet devâir-i merkeziyeye ta‘mîmen teblîğ edilmiş olmağla taraf-ı vâlâ-yı meşîhat-penâhîlerince de iktizâsının îfâ buyurulması bâbında emr u irâde hazret-i men-lehu’l-emrindir. Fî 20 Cemâziyelûlâ sene 327, fî 27 Mayıs sene 325. Sadrıa‘zam Hüseyin Hilmi